بكتب الشعر بجنوني من حدود الأرتجال
اسمع الله لا يهينك .. شف انا وشف انت وين

الشعر نجدي ولا كن طوعة جن الشمال
يعني سبعين الف جندي بينا متواجدين

قم ولاء للمعلم يعني توقف بأ عتدال
ولا في صح العباره منت قد معلمين

زي نص المسرحية شفت عادل كيف قال
ثكلتك بنت عمة جدة امك قل آمين

قال يمكن قلت ممكن بس يمكن ذي محال
ربما تفهم ولكن ربما لا تستبين

التمدد والتقلص من علوم الأختزال
والكثافة نسبة الماء تحت ضغط الأكسجين

وانصهار الثلج يعني ذاب يا ولد الحلال
تدري ان الماء اساسا أكسجين وهدرجين

والذي ممنوع صرفه بالنحو سموه حال
أسمه أنّ أو لأن زي كيف أو لأين

انقسام أية خلية من خلية انفصال
زي دولي شفت كيف استنسخوها مرتين

وانعدام الجاذبيه يعني قطع الاتصال
والتسامي علم سامي جاء بعده حرف سين

يعني لو قمت اتفلسف منت قدي بالهبال
فلسفة شاعر ولاكن فلسفة شاعر ذهين

كان ودك بس تفهم فلسفة شعري تعال
وش يسمون انحراف المركبة ذات اليمين

قال مالت قلت مالت عليك من الخبال
ما فهمت اللي نويته يا خبل منتب فطين

اضغط انتر في جهازك ينكتب لك حرف دال
حط لام وحط خاء واضغط انتر مرتين

يطلع اسمك اكتروني دلخ اقرب احتمال
كان تسمع بالذهانه يا غبي طحت بذهين

كل هذا ما هجيتك هو مجرد ارتجال
كان دوخك ارتجالي يمدحون الأسبرين

لو جمعت جيوش شعري كان سويت احتلال
بس ماودي اغامر حشمتٍ للحاضرين

بس يا ويلك لو اني واصلٍ للأنفعال
كان هالصدر الشمالي ضاق بالمتواجدين

تدري ان اكبر حماقة لو توهمت بخيال
زي من يزرع بطاطا بين ورد الياسمين

الرجوله للصغير رمزها لبس العقال
والكبير اللي جهلها قال فتل الشاربين

الرجل يلبس قلادة ويتغنج انحلال
وقصة البنت لشعرها عادة المستخوجين

والسذاجة والسماجة أسئلة داخل سؤال
من حدود البرتقاله لين توصل بابا فين

الشاعر / صالح العنزي