السلام عليكم ورحمة الله وبركاتة
هذي القصيدة اهديه الى أخوي العزيز على قلبي
ملك الذوق مشتاقين لك يا ملك الذوق وهذي القصيدة
اسمه ( جمـــــــر الغيــــــــــاب) لا طول غيابك ياملك الذوق


الحال ياللي جيت تنشد عن الحال=لاني صحيح وْ لا عليّـا خلافي
جرّيت لك من واهج الشوق موّال =واشعلت لك نار الفكر والقوافي
هاك القصايد هاك يا لابس العقال=جمر الغياب وْ لهفتي واعترافي
تركتني مابين شامت وعذّال=واهديتني حد ّ السيوف الرهافي
يمرّني طيفك مع الليل يختال =وآذب صوتي ..لكن الطيف جافي
قلت ارسمك في لوحة العشق تمثال=وإلا انت كلّك بالضلوع النحافي
ياسيّدي بعض الهوى عشق قتّال=مصيبته يظهر جميع الخوافي
حبَسْت عشقي خايف ٍ قول ينقال=حتى غيابك صابني باختلافي
عقبك حياتي تافهه والزمن مال=هبّـت على قلبي هبوب السوافي
دلو الحنايا يصطفق داخل الجال=والويل من دلو ٍ للاحباب صافي
شوقي قدح لك نار وضلوعِـيَ دْلال=وآقول لضلوعي عساها عوافي
تبدّلت في غيبتك كل الاحوال=حتى النهار.. بْظلمة َ الليل غافي
الله دخيلك صرت مضرب للامثال=حزني..قصيدي...دمعتي ..وارتجافي
ماللفرح في داخل القلب منزال=ياحسْـبـِـيَ الله جاير الهمّ ضافي
يشيلني من لوعة البعد شيّال=وانا على عهد الوفا دوم وافي
تبي الصرحه..كل طاري على البال=ضيقه بْـضيقه واسأل الله كافي
والحال دامك جيت تنشد عن الحال=بالمختصر "عقبك ترى الكون طافي"


أبـــــــــــــو نـــــــــــــــايـــــــــــــــــــــف