السلام عليكم ورحمة الله وبركاته

مســاء الخيرات .. وحيــاكم

هذي شرح سويته في احد المنتديـــات .. على مراحـــل
قلت بحكمـ ان منتديــات ذوقــي ... تسـتــــاهل الخير .. قررت اني اجيبه هنـا
بحكم انه عملــي .. ولي حرية التصرف فيه ..!
اتمنى في الاول والاخير ان الاعضـاء او الزوار يستفيدون منه...!
نبدا الشرح .. وسامحوني على القصـــور .....!
هذا شي بسيط اقدمــه لهذا الصرح .. الي رغم ان الفترهـ الي عشتها فيه قصيرهـ .. لكن المشـاعر الي عشتها معكمـ .. صدقوني كبيرهـ..!

ما اطول عليكم ونبدا على بركة الله:


في البداية اعتقد ان بعض الناس وان كانوا قله للحين يشتغلون على اصدارات قديمه للويندوز
مثل WIn2000 او Win98 ..! ومرتاح معها ويقول وش يحدني على الاكس بي وعلى التغيير!!
فيه اسباب كثيره تدفعك اذا مو تجبرك انك تغير نظام تشغيل جهازكـ !!
بذكر بعضها :

1- اول سبب واهم سبب .. ان شركة ميكروسوفت وقفت الدعمـ الفني لنظام WIn98 ..( بالنسبه لـ Win2000 .. ماني متأكد اذا وقفوه او لا) بمعنى اخر الشركه ما تنزل تحديثات للويندوز القديم .. ولا تنزل سد ثغرات النظام القديم .. يعني الله يكون في عونك .. في صد المخترقين!!
لكن نظام ويندوز اكس بي تدعمه شركة ميكروسوفت وتصدر له التحديثات وسد ثغرات النظام ..!

2- ثاني سبب واعتقد انه لا يقل اهميه .. ان اكثر البرامج الجديده ما تشتغل على النسخ القديمه من الويندوز .. اشهر مثال الاوفيس . الاصدارات الجديده ما تشتغل على الويندوز 98 !!


3- السبب الثالث ..قوة نظام التشغيل ويندوز XP ومرونته ووسرعته وهذي من اهم المميزات الاساسيه .. ومميزات اكثر .. منها اساسيه ومنها كماليه .. مثل اشكال الايقونات وغيره .. مع انها غير مهمه الكماليات ..!!
ذكرت بعض الاسباب واعتقد اهمها ..!

الحين ننتقل لنقطه ثانيه :... وهي الي ما زالوا يشتغلون على انظمه قديمه .. لكن يبي يحدثون اجهزتهم ويثبتون الويندوز XP ..!!

بعض الاجهزه لا تقبل الويندوز اكس بي .. او بالاصح لا تستطيع العمل في بيئة ويندوز اكس بي .. انا صراحه ما اعرف مواصفات معينه للاجهزه الي تقدر تشتغل على الويندوز XP .. لكن بذكر اهم المواصفات .. اهمها الذاكره العشوائيه ( الرام Ram) لازم تكون اكبر من 64 يعني لازم تكون 128 ميقا بايت .. او اكثر ..
وبالنسبة للمعالج . .انا عن نفسي ثبت الويندوز XP على جهاز بمعالج انتل سيلرون سرعته 1 قيقاهيرتز .. وماشي معي تمام ... ( سليرون اقل المعالجات كفاءه في عائلة الانتل )
طيب الحين كيف يعرف الواحد مواصفات جهازه ..!!؟
الامر سهل اتبع الخطوات التالية:
اضغط ابدأ .. بعدها .. امر تشغيل .. بعدها اكتب في المربع الي طلع لك dxdiag واضغط موافق.!
اتبع الصوره






الحين عرفت مواصفات جهازك .. اذا هي تصلح كمل معنا اذا ما تصلح .. دور لك حل
ركب ذاكره زياده .. ( وهذي نجيها ان شاء الله في دورة صيانة الحاسب ان شاء الله )
شف لك حل .. واذا ما فيه حل .. الله يعينك على الويندوز 98

قررت انك تثبت الويندوز XP
اللي اقتنعوا بالويندوز XP .. بعضهم يبي يروح لمحلات الكمبيوتر ويعطيهم الدراهم ويجيهم اخر النهار ياخذ جهازه .. وهذي شغلته كل مره يبي يفرمت جهازه او يبي يثبت الويندوز!!

وبعضهم يبي يتعلم طريقة الفرمته ( ويجربها ) بعدها يا تصيب يا تخيب .. واذا صابت كان بها .. واذا خابت يشيل جهازه ويلحق خويه الي قبل شوي لمحل الكمبيوتر ويرجعونه له جديد ..!!

خلونا مع النوع الثاني الي يبي يتعلم ويبي يوفر .. وقد يكون اسباب اخرى .. يمكن انه في منطقه ما فيها محلات كمبيوتر ..! ما علينا مهما كان السبب..!؟
الحين نبي نشرح للشباب والشابات .. كيف نفرمت الجهاز ونثبت الاكس بي .. وحنا جالسين نشرب كوفي (قهوه :) ) !!

الموضوع سهل .. وابي اسهله اكثر بالصور . كل خطوه بصورتها ..! وكل نقطه بنوضحهـا!!؟
اول شي ابي اشرح وش هي الفرمته ( الفرمته طالت اعماركم هي انك تمسح كل شي على الجهاز من ملفات ومن فيروسات ومن برامج كل شي )!!
لكن بعض الشباب ( الشابات مفهومه ضمنيا ً :D ) عندهم ملفات على اجهزتهم ما يبون يخسرونها وضروريه لهم ..!
طيب وش الحل !!؟

الحل سهل وبسيط ... القرص الصلب ( الهاردسك ) في كل جهاز مقسم الى اقسام ( C و D و على حسب الجهاز .. ) وفيه بعض الاجهزه ما فيه الا قسم واحد الي هو C ..
شف الصوره:


طيب الملفات الي نبي نحفظها !!؟
عندنا طريقتين /
اول طريقه هي .. اننا نحفظ ملفاتنا الي نبيها على قسم من الهاردسك .. مثلا D ونفرمت C ..!
او اننا نحفظها على سي دي CD-ROM ( للي عندهمـ سي دي رايتر CD-R ) يعني عندهم جهاز السيديات يقدر يكتب على السي دي ..!
الحين نجمع الملفات كلهــا على القسم D .. واذا خلصنا وجمعناها نبدا في الجد !!
بوضح نقطه .. الي نقدر نحفظها هي الملفات( صور مقاطع ملفات وورد او اكسل .. وغيرها .. كلها طبعا ملفات ترضي الله) ..
لكن البرامج . اغلبها يحتاج اعادة ثبيت يعني حتى لو نسخت ملفات برنامج معين ( مثل الريل بلير) .. بعد الفرمته لو ترجعه للـ C ما راح يشتغل ..!

اهم شي ملفاتك ونسختها على الـ D ... او نسختها على سي دي CD-ROM ..المهم دبرت نفسك وحفظت نسخه من ملفاتك!
================================================== =
طيب الي ما عندهم سي دي رايتر .. ولا عندهم الا قسـم واحد من القرص الصلب ( الهاردسك) الي هو C
وش الحل؟ ... الحل انك تقسم الهاردسك الى قسمين او اي عدد تحتاجه .. تقسمها قبل الفرمته .. وتحفظ ملفاتك في احد الاقسام الجديده وتفرمت القسم الثاني .. وبعد تثبيت الاكس بي ترجعها ..!
نبي نشرح طريقة تقسـيم الهاردسك لاكثر من قسم ( للي ما عندهم غير قسم واحد في الهارديسك) :
انا افضل استخدام برنامج ليقوم بالعمليه هذي .. وانا بشرح لكم واحد .. والي ما يعجبه البرنامج.. ما عليه الا انه يقوقلها رؤية الروابط خاصة بالاعضاء فقط ويشد حيله في البحث ..!
انا جبت شرح مفصل لبرنامج Partition Magic8 لتقسم القرص الصلب
رؤية الروابط خاصة بالاعضاء فقط

اعذروني ما امداني اجهز شرح .. لكن ان شاء الله الرابط يفيد ..!!
ولاي استفسار .. انا والاخوان موجودين..؟!
================================================== =

الحين قسمت القرص الصلب (الهاردسك) .. اجمع ملفاتكـ في قسـمـ ونبي نفرمت القسم الاول .. الي غالبـا هو الـ C

قبل الفرمته .. لازم نحفظ تعاريف الجهاز .. اذا كان عندك سيديات الجهاز .. وسيديات الاجهزه الي عرفتها على الجهاز كان بها اذا ما عندك .. حمل البرنامج الي بشرحه الحين واتبع الشرح ...!
فايدة البرنامج .. يحفظ جميع تعاريف الاجهزه الي شبكتها على جهازك وعرفتها عليه ..!!
اذا انت مو فاهم وش اتكلم عنه .. انصحك تحمل البرنامج وتتبع الشرح وان شاء الله امروك كلها تكون تمام
برنامج WinDriverGhost لحفظ تعاريف الجهاز...!
حمل البرنامج >>>> رؤية الروابط خاصة بالاعضاء فقط
اذا حملت البرنامج فك الضغط عنه .. وبعدها شغل البرنامج ..!
اذا ظهرت لك الصوره التاليه .. اتبع المكتوب فيها ..؟ اضغط على زر Register later


اذا ما ظهرت لك الصوره الي فوق تبي يظهر لك الصوره الي تحت ..واجهه البرنامج :


الجهه الي يمين فيها ازرار البرنامج وهي الي نبيها ونبي نشرح كل زر فيها :
الزر هذا يجلب كل التعاريف للاجهزه الي عرفتها من سي ديات خارجيه .. يعني ماتعرف عليها الويندوز

الزر هذا يجلب جميع التعاريف الموجوده في جهــازكـ ( انصحكم باستخدامه .. وابي اشرحه بعد شوي )

الزر هذا يحظر تعريف جهاز معين تحدده انت .. مثلا الطابعه .. او السكانر ( الماسح الضوئي )

الزر هذا يحظر جميع ملفات التعريف في الجهاز

الحين بشرح طريقة الاستخدامـ :
نضغط على زر Fast Collect كما في الصوره


الحين جمع جميع التعاريف الي بجهازي ... اذا ابي احفظها كلها اضغط على زر Make All
اذا طلع لي المربع الي احدد فيه مكان حفظ ملفات التعريف .. طبعا احفظها في القسم الي ما راح افرمته .. يعني احفظها مع ملفاتي الضروريه في الـ D
مثلا تابع الصوره:


اذا كنت ابي احفظ تعاريف اجهزه معينه اختارها واضغط زر Make .. هذا للي يبون تعاريف معينه .!
حنا نبي نتبع الطريقه الاولى . ونحفظ جميع ملفات التعريف...!

الحين حفظنا ملفاتنا المهمه وملفات التعريف للجهاز .. نروح ننام وبعدين نكمل ان شاء الله ..!

<< تعبت من كثر الكتابه .. اترككم .. تشاورون انفسكمـ .. او تجمعون ملفاتكـمـ في جزء من الهاردسك ... وتفرغون الثاني .. نجري عليه عملياتنا ..!!
نكمل باقي الشرح في يوم ثاني ... وبالنسبه للي شغالين على ويندوز XP .. ينتظرون الاجزاء المتقدمه من الشرح ... والي ان شاء الله نبي نطلع فيها على طريقة العمل على الاكس بي والاستفاده بأقصى قدر من موارد هذا النظام .. ونتعرف على خفاياه واسرارهـ ...!؟

انا كتبت الموضوع وضغطت (( اعتمد الموضوع )) .. يعني ما راجعته لأني صراحه تعبت من الكتابه .. لكن اي خطأ نبهوني اعدله .. خصوصا من خبراء المنتدى ..! والعليميه مثلي..!؟

وأي واحد يدلي بدلوه في الموضوع وينورنا ويعلمنا ونكون له شاكرين ...!


تقبلوا تحيات اخوكم وآفــــــــــــي