السلام عليك ورحمة الله وبركاته
صـبـحكمـ الله بالخير جميــعــا .. كل واحد باسمه ...!


نكمل الدرس .. الي اتمنى انكم تستفيدون منه ..!

الحين بعد ما جمعنا ملفاتنا وتعاريف الجهاز .. ما باقي الا نفرمت الجهاز ونثبت الويندوز
اول شي متطلبات الفرمته والتثبيت ..
شي واحد بس : القرص المضغوط حق الويندوز اكس بي .. وهذا تحصلونه في اي محل كمبيوتر .. او اي واحد يبسط عند مسجد يبيع سيديات :)
... قيمته عشره ريال بس ( لا احد يضحك عليكم يبيعه بخمسطعش )..
او يمكن انه جا مع الجهاز اول ما اشتريتوه .. تأكدوا منه..؟

المهم الحين اذا الجهاز شغال اعمل له رستارت ( اعادة تشغيل ) واذا طافي شغله ..
اول ما يبدا الجهاز يشتغل نضغط على F10 ( موجود في لوحة المفاتيح فوق ) او نضغط على ديليت DELETE اي واحد فيهم ..
.. طبعا على حسب المذربورد ( اللوحه الام في كل جهاز ) ما عليكم من كثر الكلام .. اضغطوا Delete وتمشي معكم ان شاء الله ..
اهم شي انك تضغطها وقت الجهاز ما يشتغل على طول .. للتأكيد اضغطها اكثر من مره
حتى يطلع لكم مثل الصوره الي تحت . او صوره مشابهه ( حسب اللوحه الام مثل ما قلت ) : تابع الصوره

نحرك بالاسهم الي في الكيبورد ونختار كما موضح في الصوره فوق .. Advanced BIOS Features

الحين يبي يطلع لنا الصوره التاليه ..


ننزل بالاسهم الي بلوحة المفاتيح حتى نوصل First Boot Device
بعدها نغير قيمة الاختيار هذا بعلامة الزايد والناقص + , -
نخليها على السي دي روم .. ATAPI CD-ROM
طبعا تختلف طريقة كتابة ATAPI CD-ROM من جهاز لجهاز .. انت الي عليك انك تختار السي دي روم .. يعني من الاختيارات تبي تفهم وين السي دي روم ..
تحت الاختيار First Boot Device فيه السطر الي تحته مكتوب Second Boot Device و
وتحتها سطر مكتوب Third Boot Device
نغير قيمها كلها لين تصير بالترتيب التالي :
First Boot Device [ATAPI CD-ROM]
Second Boot Device [Floppy]
Third Boot Device [HDD-0]
ومثل ما قلت الاختيارات تغيرها بعلامة + , - ...
ولا تنسى بعد مثل ما قلت الاختيارات على حسب اللوحه الام لكل جهاز .. لكن كلها قريبه من بعضها ..

الحين بعد ما سوينا كل الي فوق نضغط على زر F10
يطلع لك رساله فيها SAVE to CMOS and EXI (Y/N)?
نضغط على حرف Y من لوحة المفاتيح ..

تبي ترجع للشاشه الي جت قبل شوي .. نضغط على F10 مره ثانيه ..
وتطلع لنا نفس الرساله الي قبل شوي نضغط على Y مره ثانيه .. مثل الي في الصوره التاليه:


بعدها الجهاز يبي يعيد التشغيل مره ثانيه .. ويمكن ما يعيد التشغيل على حسب الجهاز كما ذكرت ..

المهم .. السي دي طبعا موجود من قبل في الي سواقة الاقراص .. يعني حط السي دي قبل تطلع من الشاشات الي قبل شوي ..
اذا اعاد الجهاز التشغيل .. يبي يطلع لنا شاشه سودا مكتوب فيها .. Press Any Key To Boot From CD
اضغط على اي زر في لوحة المفاتيح .. بعدها يبي يطلع لك كما في الصوره :


اترك الجهاز يحمل ملفات التشغيل .. على حسب سرعة سواقة الاقراص عندك وحسب سرعة جهازك
اذا حملها وخلص يبي يطلع مثل الي في الصوره :


نضغط زر ENTER من لوحة المفاتيح مثل ما تشوفون في الصوره السابقه ..

الحين يجيك مثل الي في الصوره التاليه :


نضغط على زر F8 مثل ما تشوفون في الصوره السابقه ..

الحين يجيك شاشه مثل الي في الصوره التاليه:


نختار الهاردسك الي عليه الويندوز ( انتبهوا تختارون الهاردسك الي عليه ملفاتكم وملفات تعريف الجهاز .. وتلوموني بعدها )
نختارها طبعا بتحريك الاسهم الي في لوحة المفاتيح ..

بعد ما اخترنا الجزء الي نبي نفرمته ونثبت عليه الويندوز نضغط ENTER من لوحة المفاتيح..
يجينا مثل الصوره التاليه :


النوع الثالث للي يشتغلون على شبكات اضمن لهم .. وهو اقوى الانواع خصوصيه . انضحكم تختارون الثالث ..
نختار الاختيار الثالث ونضغط ENTER
يجينا مثل الصوره التاليه :


الحين النظام يفرمت الجهاز .. نتركه لين يخلص من الغرمته .. بعدها يجينا مثل الصوره التاليه :


بعد ما ينسخ جميع الملفات الي يحتاجها للتثبيت .. يجيك مثل الصوره التاليه:


بعدها يبي يعيد تشغيل الجهاز مره ثانيه .. وبعد ما يشتغل يجيك مثل الصوره التاليه .. الي هي صورة الويندوز اكس بي :


وبعد ما تروح يجيك شاشات التثبيت مثل الصوره التاليه :


بعد دقايق وبعد ما يثبت معظم المكونات يبي يطلع لك مثل الصوره التاليه :


نضغط على زر Detail بي يطلع لنا مثل الي في الصوره التاليه :


نضغط مثل ما في الصوره على زر Add بعدها يطلع لنا مثل ما في الصوره التاليه :


نختار منها الدوله ونوع لوحة المفاتيح .. اتبع الصوره السابقه فقط .. بعدها تبي ترجع لنا الصوره الي قبل شوي..!
نضغط موافق مره ثانيه . !

بعدها اثناء التثبيت يجيك شاشه مثل الصوره التاليه :


بعدها يجيك شاشة ظبط الوقت مثل الصوره التاليه :


اظبط الوقت بعدها .. اضغط موافق او OK

الحين يجيك شاشه يطلب منك الرقم السري (رقم التسلسل)حق الويندوز .. طبعا عاده تحصله مع السي دي حق الويندوز .. واذا ما حصلته

هذي مجموعه ارقام للاحتياط ..
VFWGM-3GRYG-QB43V-MVP84-XB3G9
HHBCG-3V2QR-72KPV-YQCXW-KHGJ7
YVGKQ-B7QYX-WWPBR-M7T2R-PB8BM
XW6Q2-MP4HK-GXFK3-KPGG4-GM36T
X4682-4BKMH-M4MRW-MY32H-FC8BD
DX87K-XKPJ3-2H4D6-TX47Q-J46B6
V773F-CY2FD-KTPCF-RKYR7-FK42J

الحين بعد ما تحط الرقم .. يشتغل الجهاز .. ويطلع لك سطح المكتب مثل الصوره التاليه:


الحين معناها انك ثبتت الويندوز اكس بي بنجاح ..

تلاحظون ما على سطح المكتب الا سلة المحذوفات .. طيب وين باقي الايقونات .. نجي الحين كيف نحط باقي الايقونات
اللي هي جهاز الكمبيوتر ومجلد المستندات و الاكسبلورر ..

اضغط بزر الفاره اليمين .. على اي مكان فاضي في سطح المكتب .. ومن القائمه الي تطلع لك اختر ( خصائص )
يطلع لك مثل الي بالصوره التاليه:


بعد ما تختار تخصيص سطح المكتب .. يطلع لك النافذه الموضحه بالصوره التاليه :


بعد ما تحدد الخيارات الموضحه في الصوره فوق .. نضغط على موافق..!


وكذا نكون انهينا عملية فرمتت الجهاز وتثبيت الاكس بي .. واذا فيه شي مو واضح .. اسأل قبل تسوي اي شي ...!
والموضوع بسيط يا جماعه .. يبي لها واحد يمشي خطوه خطوه مع الشرح بس ..!

تـحـيـات اخوكم وآفــــي