لا علشان الكبار ولا علشان الصغار
من حشم نفسه حشمها وهانها من هانها
القلوب اللي تحشى والعقول اللي تدار
ماتميز في وفي الناس من خوانها
ولو تعرف الهذرويه ويش لذة لختصار
كان عينت الاوادم واجد شيخانها
تكبر النفس الكبيره بين غار وبين نار
غارها كبار الهقاوي ونوشها نيرانها
والنفوس المستريحه ماتحاتي ويش صار
لا تجازي من يعنيها ولا من عانها
يبني ابن ادم ويدري كل ما يبني دمار
ما يحب الله من الاعمال غير احسانها
لاجفتك الدار فارقها وبدال الدار دار
الصبر عنها ولا صبرك على حقرانها
قارب طوال العمار وفارق طوال العمار
كان فالبستان ورده شوكها بوزانها
والدفاعات القويه مايفككها الحصار
حتى لو طرواده تهوز العرب بحصانها
اختلاف الراي نعمه وانعدام الراي عار
والجمال اللي تحمل حملة حشوانها
والكرامه راس مال وكان راس المال طار
لا يعز الله دوله ماتعز انسانها
والحفاوه والصداقه والمحبه فالنهار
القلوب بيوت ليل سكرت بيبانها
والغرور اول دخول الرجل دايرة البوار
راح يرفع من قدر نفسه ووطى شانها
والغضب سيف الجهاله كل ماسل استدار
وبت يمنى لوحت به وسلمت عدوانها
والخطى يدمح ليامن عقبه حسن اعتذار
مايساوا البوح بالزله مع جحدانها
والصغر ماهوب سفاهه والكبر ماهوب وقار
كم كبير سايق روحه على نقصانها
والهوى تفسيره اصعب شي وكباره كبار
خلد التاريخ ناس خلدة خلانها
والتطور عند بعض الناس يعني لاتغار
غظ طرف وكف يدك ولا تشد عنانها
فك بنتك فالشوارع مثل تكسي الاجار
ولا تدخل لا بقصتها ولا بفستانها
كل شي نحسب انه مستحيل يصير صار
يالله بستر القلوب المؤمنه بيمانها
والمجامل فالامور العابره ماله مضار
من يصارح كل خلق الله يبي خسرانها

قصيدة اعجبتني للشاعر عبدالله علوش وحبيت انقلها لكم

تحياتي للجميع ،،،،