أبو نايف

تابع ( 2 )

لي كرامة



يا الله إني طالبك منها السلامة
الحياة اللي مناكرها تهيا

الفتن في هالحياة أكبر علامة
من بغا فيها الفتن قيل لْه : هيا

ضيّعوا فيها دروب الإستقامة
والمراجل منهم تْشوف الجفيا

ناسٍ تْحدّك على دْروب الندامة
وإعتزال الشر ما يصعب عليا

إعتزلت اللي غضب ربه مرامه
وْكل منهو يبغض رْجال الحميا

وْكل منهو قاضبٍ درب الغشامة
وْمن يدوّر في ذرا الدينار فيا

ما عليّ خْلاف فالليل وظلامه
المراجل كلبوها في يديا

لي كرامة ما تضاهيها كرامة
كود للي مْقاصرٍ نجم الثريا


لو وقفوا هالغرب في صف شارون

أبدي بذكر المرتجى خالق الكون
الواحد اللي دوم لرضاه راجين

اللي حكم بالكون بالكاف والنون
سبحانه اللي نزّل آيات ياسين

ومن بعد ذكر الله أبا اقول وش لون
تبدّلت فينا من الزين للشين..!؟

تاريخنا بالمجد له ساس وقانون
والوقت بدّل ما لنا من قوانين

اللي أشوفه يا عرب بالتلفزون
غير الذي حاصل من أعوام وسنين

أشوف شيٍ مثل ما انتم تشوفون
وش حاصلٍ بالقدس وباقي فلسطين

ذيك الديار اللي بها المجد مكنون
مسرى نبي الله ومهد النبيّين

أشوف فيها العدل ماهوب مصيون
وأشوف فيها ذل ناسٍ عزيزين

وأشوف فيها الظلم والذل والهون
ولا تقبل الذلّة نفوس الكريمين

ناسٍ بلا مسكن وناسٍ يموتون
وناسٍ على وضح النقا مستذلَين

اللي بقا منهم بهالأرض يفنون
وأكثرهم اللي عن وطنهم بعيدين

تبغى السلام اللي على الحفظ والصون
والسلم ماهو في يدين المجرْمين

اللي طغو فالأرض والناس يدرون
ما مثلهم بالكون كود الشياطين

أنجاس للإسلام دايم يكيدون
يا الله تحبط كيدهم هالملاعين

ذولا خنازيرٍ على الأرض يمشون
حرام إن ذولا امخلوقين من طين

لو وقفو هالغرب في صف شارون
حنا بصف اللي يهز الميادين

ربٍ كريمٍ عز موسى وهارون
وأنجى نبيّه من كيود المشرْكين

يا الله يا اللي لك عبادك يصلون
يا الباقي وكل المخاليق فانين

تنصر عبادٍ لك على قوم صهيون
وتجلب لهم يومٍ مثل يوم حطّين

تمّت بحمد المرتجى خالق الكون
والحمد للخالق على نعمة الدين



سواها قلبي


سواها قلبي .. يا حبيبي وحبك ..
ما طاعني وانا عن الحب ناهيه ..
الظاهر انه .. ما يبي غير قربك ..
عاف الجميع واول الناس راعيه ..
عليه ما اوصيك لاصار جنبك ..
صبح عليه بحب .. وبحب مسيه ..
نبضه وفا .. وبتضحياته يعجبك ..
صافي ولكن ما لقى من يصافيه ..

خلا دروب الكل واختار دربك ..
داريه تكفه قد ما فيك داريه ..
وابشر بقلب ما يبي غير قربك ..
يموت وغير محبتك ما سكن فيه ..



جيت أشتكي لك من عنا الوقت ابرتاح

جيت أشتكي لك من عنا الوقت ابرتاح ... لقيت نفسي أشتكي من همومك

يا عونة الله ما بقى شي ما راح ... مدري ألوم الوقت والا ألومك

جيتك وقلت بعالي الصوت : يا صاح ... بالله ساعدني ترى اليوم يومك

لا النفس مرتاحه ولا القلب مرتاح ... وحسيت نفسي واحد من خصومك

اثريك صاحب بس في وقت الافراح ... وبكل سهوله ترخص اللي يسومك

الله يعين القلب وشلون يرتاح ... زود على همومه تحمل همومك


يا حلو لثغتها


نور عيني تبعثرني متى ما لفت = وكل الاوراق تتلخبط بشوفتها

لا حضر نورها نور الليالي خفت = ذيك حتى المسا يحسب لطلتها

المشاعر ليا من صادفتها دفت = والاحاسيس تتباشر بجيّتها

أنجذب حيل صوب عيونها لا غفت = تجذب الكون كله جاذبيتها

إن صفا جوها دنياي معها صفت = ما يروّق مزاجي غير ضحكتها

البراءه ليا منا كبرنا اختفت = بس اهي عكسنا زادت براءتها

إن حكت من خجلها دنّقت وارجفت = هذا هالحين وشلون بطفولتها ؟!

كن بلسمها لثغه ليا سولفت = بس يا حلوها ويا حلو لثغتها



جتني قصيده كنها رسم رسام


جتني قصيده كنها رسم رسام = أصيلة وآنا هواي الأصيله

ومن يوم جتني هاجس الشعر حوّام = ومن طيب راعيها نويت احتسي له

لوّ المراجل نعتبرها بالارقام = أنا اشهد انه بياخذ اكبر حصيله

غلام سعد اللي لهم مثله غلام = أشفى غليل ابوه واشفى غليله

وعنده قلم مهو مثل كل الاقلام = محرّم ما يكتب الا الجميله

هو يشتكي لي كل ما صار منضام = وانا على طول ان زعلت اشتكي له

بقول له دامه على الوقت لوّام = الوقت بيدنا ولاباد حيله

ياخوي لا تتعب بتحسيب الاعوام = مافات خلّه واتركه لا تخيله

شفني أنام أحيان واحيان ما نام = أفرح دقايق وانطوي كل ليله

كني شعب بغداد والوقت صدام = ما هو بكيفي غصب قمت انحني له

حملي تقسّم وانقسم عشرة اقسام = حاولت اشيله لكن ازريت اشيله



لمحت لك


ياللي تعيش بهنا = حس بشعوري أنا

لمّحت لك ألف مرة = وانته ولا انته هنا

جيتك وكلي غرام = وسمّعتك أحلا الكلام

وانته ولا ملتفت لي = يا سيدي والله حرام

طولت بالي عليك = لكن تعبت ارتجيك

مدري أبيك وتبيني = أو بس أنا اللي أبيك

ياللي العمر ما كفاك = متى تحس بغلاك ؟

أموت واعرف حبيبي = ايش آخرتها معاك ؟



أنت اللي خسران

أنت اللي خسران يوم انك تزعلني
والا أنا واجد أحبابي وخلاني
ان كان ربي عطاني عمر وامهلني
مصيرك تشوف من يندم على الثاني
بتجاهلك ماهوبس أنت اتجاهلني
عهد علي أني أنسى من تناساني
وأعاملك مثل ماشفتك تعاملني
وان قاله الله وعد ليجيك ماجاني
مسكين حدك اذا مفكر بتشغلني
ماتهز شعره عشان تهز وجداني
كني أشوفك تجي بكره تحايلني
وتقول توبه ماعاد أعودها ثاني
وأقول لك حل عني لاتجادلني
حرمت أنا مايجي لسانك على لساني
دامك بديت اتحداني تحملني
من قال لك ياصغيرون اتحداني


يابو فهد لاصرت تنشد


يابو فهد لاصرت تنشد عن الحال
حالي بها ياخوك عشرين عله
لي صاحب يسوى ثلاثين رجال
كل شهد وانا بعد شاهد له
طيب ....وفي .....كريم في كل الاحوال
ومن عاشره اقسم قسم ما يمله
كنت اتعذر له اذا زل او عال
بيني وبينه ماتجي اي زله
ما كنت اظنه يسمع القيل والقال
الين ماقفى وانا مقبل له
كشر بوجهي واحسبه ضايق البال
واقول في نفسي : مهي عاده له
اثره سمع يابو فهد هرج الانذال
حطوني ابغظته وانا منصح له
واليوم ابيك تحلها وانت حلال
يا سيفي اللي لاتضايقت اسله
يا طيب فعلك يوم اطالع بالافعال
انا اشهد ان اللي يغلك تغله
يابو فهد كن المراجل لك عيال
والطيب كنه عود وانت ولد له
ابيك تنشد وش بلا صاحبي مال
رح وشف وشبه تغير وقل له:
كانه يبيني حاول تحل الاشكال
وكانه مقفي جعلها سفره له