أبدأ بذكر الواحد النافع الضار
رب العباد اللي عليه اتكالي
وأنقى من جزال الطواريق وأختار
قاف محله فوق روس المعالي
وشلون ما تبدع وتنقاد الافكار
والشعر يكتب في حميد الخصالي
فالمصطفى المختار من نسل الاخيار
خيرة جميع الخلق فاول وتالي
صلى عليه الله عدد وبل الامطار
وعداد مالاحت بروق الخيالي
وعداد ما هز الهوا غصن الاشجار
وعداد ماهبت هبوب الشمالي
وعداد ما تنبت على الأرض الازهار
وعداد حبات المطر والرمالي
وعداد ما صلى مصلي بالاسحار
وعداد مادارت صفار الدلالي
وعداد ما يلهج موحد بالاذكار
وعداد ماقد مر ذكره فبالي
وعداد ماتبدي على الكون الانوار
وعداد ماقد هل نور الهلالي
الشعر يعجز والهواجيس تحتار
وشلون توفي قدر خير الرجالي
هذا محمد سيد الغر الابرار
أغلى على الخفاق من كل غالي
هذا محمد خير هادي ومختار
سيد ولد آدم بليا جدالي
المومن المتصدق العابد البار
المعطي جزال العطا والنوالي
أتقى عباد الله في سر وجهار
وأشجع شجاع في نهار النزالي
وأكرم كريم يكرم الضيف والجار
وأصدق صدوق صادق في المقالي
هو خير مدثر وهو خير من سار
وهو خير مزمل يقوم الليالي
كم وارد يارد لعده وصدار
ولا يشربون إلا القراح الزلالي
ما فاز غير اللي على منهجه سار
اللي تبع نهجه على كل حالي
تسابقت في طاعته صم الأحجار
وحنت له جذوع النخل والجمالي
أشرق سنا نور الرسالة من الغار
نور الهدى نور التقى والكمالي
يالين عم النور في كل الأمصار
والدين عم وماضي الشرك زالي
أدى الأمانة مابها شك وغبار
حرم حرام الله وحل الحلالي
له عند رب العرش رفعة ومقدا
قدره عزيز عند ربي وعالي
يا لله يارحمن للذنب غفار
تغفر ذنوب أهل الخطا ما تبالي
يا رب ما شفناه في هذي الدار
ولا تمتعنا معه بالوصالي
يا رب تجمعنا معه بين الأنهار
في جنة الفردوس يا خير والي
ويامدعين الحب يا نسل الأنصار
وشلون خير الخلق قدره يطالي
تطاولوا فوقه مربين الأبقار
أهل الجهل والزيغ وأهل الضلالي
شلت يدين اللي رسم رسمة العار
ومن نار ربي جعل يصلاه صالي
اللي رسمها لو أشوفه بالأنظار
والله لاحطه تحت وطية نعالي
يالله ياقهار ياحي جبار
يا مهلك طغاة القرون الخوالي
يارب تهلكهم بلا سابق إنذار
ويبقون عبرة للقرون التوالي
اجعل منازلهم بقايا وتذكار
واجعل بلدهم دارس العهد بالي
ولاعاد يبقى من هل الشرك ديار
الكفر وأهله جعلهم للزوالي
هذا جزا دار الخنا دار الأشرار
الشر عاقبته شرور ونكالي
الشجب والتنديد وأسلوب الإنكار
مايفيد مع قوم الخنا والخمالي
لازم نقاطعهم على طول الأعمار
ولازم نحاربهم بخشم الريالي
في جرمهم ما يفيد تبرير وأعذار
ذنب عظيم وهز صم الجبالي
تطاولوا فوق أفضل الخلق باصرار
والجرح وسط قلوبنا لايزالي
تفداك ياسيد المخاليق مليار
ويفداك أبي وأمي وحالي ومالي
وتفداك كل الناس من كل الاقطار
غرب وشرق ومن جنوب وشمالي
مدحي لخير الخلق هو تاج الاشعار
وهو مكسبي فعلاً وهو راس مالي
مدح الحبيب المصطفى تاج وشعار
وارجي ثوابه عند رب الجلالي
في يوم تكشف به خفيات الأسرار
ويفر منك أقرب قريب موالي
لشاعر / عماد الشريف
أبــــو نــــايـــف