نعلم بأن الخنساء وهي تماضر بنت عمرو السلميه اشتهرت برثاء اخويها
صخر ومعاويه واشتهرت قصائد رثائها لهم ..
وكان لها اربعة ابناء جميعهم استشهدو فكانت قصة صبرها على فقدها
اخويها وابنائها ..
هذه قصة على صــبر المرأة على مصــابها وبلاءها ..
وهنــــــا في هــذا الزمــان إمرأة لقبت بخـــنساء الرياض
وهي :
((صاحبة السمو الملكي الاميره البندري بنت عبدالعزيز آل سعود)) رحمها الله ..

الصابره على ما ابتلاها الله من مصائب كبيره وعظيمه
هي التي فقدت ستة من ابنـــائها على التوالي
وهم: ســعود و محــمد و فــهد و متــعب و مــوضي و جهــــير..

لكن لها قصة رثاء طويله مع إبنها البكر ((سعود ))
وهذه مختارات لبعض قـــصائدها :



(ياسعود)

يا سعود كلٍ بالشعر قام ينعاك.........ويبين أخصالٍ لشخصك حميده
بالعون حنا كنـــا ما عرفنــــــاك.........كل يســــافر يـــم دارٍ بــــعيده
إمنول ياسعود سلواي جمعاك.........تشيل عنــي كل بلوى شـديده
أنت رحلت و والي العرش ناداك.........عساه لك مشتاق صفوة عبيده
عساه يوم الحشر ياسعود يرعاك.........يثقل موازينــك ولأجرك يزيده
واليوم أنا ياسعود سلواي طرياك.........أتابع أخبــارك بوسط الجريده



( ياعزوتي ليه ؟! )
اللي رحل عني بلحظه وأنا أرجيه.........وأدعي بعالي الصوت مالي مجيبي.
لــو ينفــــدا بالـــروح والله لأفـــديه.........أفديه باللي لي بعيد وقريبي.
كل يداواي جرحه اللي سطى فيه.........وأنا جروحي كاميه ماتطيبي.
ياسعود عني رحــت ياعزوتي لـيه.........خليتني ياسعود قلبي صويبي.
أمشي مع المخلوق واللي بي أخفيه.........واسهر طوال الليل وانحب نحيبي.

(لين اجتمعتوا)

لين اجتمعتوا لدّت العين لسعــــود ......... قامت تلفّت وين قرّة نظرها .
وين الكريم اللي سلك سكّة الجود ......... كم واحدٍ نفسه كسيره جبرها.
أضحك وأنا قلبي من الحزن ملهود ......... وأغضى وأذل العين تنثر دررها.
رضيت بالمقسوم وأيامي الــسود ......... وكتمـت نيــرانٍ تطاير شــــررها.
أبي رضــى ربٍ كــريمٍ ومــاجـــود ......... علام مافي برّها مع بحرها .
لعل يجمعــني بهم خير معبــــود ......... في جنة الفردوس نقطف ثمرها.




(جرحي على سعود)

إن جيت للبيت قام الفكر يلعب بي.........وان رحت للخرج صاب القلب ولوالي.
ماعاد أميّز واعرف الجدّ واللعــبي......... غديت مثل الخلوج أمشي على فالي .
ياسعود هذي تدابير الولي ربــي ......... والعبد ماله عن اللي دبّر الوالي .
جرحي على سعود ماينفع به الطبي ......... وشلون أبسلى وهو دايم على بالي.
أحسّ صوته ينادينــي وأنا ألبّـــي ......... يقول يمـه نسيتي شبلك الغالي.
وشلون أبنساك وانته ساكنٍ قلبي ......... أنت حبيبي وزولك دايم قبالي.



(الدمع غار)

ليت المنايا وقفت عنك ياسعود ......... خلّتك لين أوريتني في ضريحي
ياليتني حطّيت انا عنك بالعود ......... وانت معافا ياجنيني صحـــيحي
أنت الصديق الصادق الود ياسعود ......... وانت الطبيب لقلبي اللي جريحي
انا أشهد أني عقب فرقاك مقرود ......... ماأنلام أنا لو كان اصفّق واصيحي
والله لاصيحك لين أجاورك ياسعود ......... الله يعجّل جنب قبرك مطيحي
الدمع غار وجفّت العين ياسعود ......... والقلب ينحب والجوارح تصيحي



(يافهـــــــد)


كل ماقلت أبسلى زاد قلبي جروح ......... قام يصفق خفوقي مثل صفق الهوى.
أتصبّر ودمعي بالذي بي يبـــوح ......... لوبغى القلب ينسى يافهد ماقوى.
بالنهار أتجمل والصدر به يفــوح ......... مثل بــركــان يغلــي بانفجاره نوى.
لي ضوى الليل أصلي عند ربي وأنوح ......... مثل مقروص الأفعى لي صرخ والتوى.
عقب مضنون عيني يافهد وين أروح ......... ليتني مت قبله..أو قضينا سوى.




( أصفق عليك الكف )

أصفق عليك الكف ياسعود وانوح.........مثل الخلوج اللي تردا جهدها
تثور من حزن يجوح الحشى جوح.........وقل الجهد ما تنثني منه يدها
طاحت عقب ماقوموها على لوح.........خلوج طاول سقمها من ولدها
مثلي وانا حزني على لبة الروح.........جدد على النفس الحزينه نكدها -




( ليتني ..)


من يلوم العين لو هلت دموع.........ومن يلوم القلب لو صفق وصاح.
لي حبيبٍ راح ماطرى الرجوع.........ليتني ودعــت زوله يـــوم راح.
آه من قلبٍ كفخ بين الضلوع.........مثل كفخ الطير مكسور الجنــاح .
ليتني وسط الخلا وأعطش واجوع........ولاسمعت اللي نعى هالك الصباح.
ساهرة ياسعود والعالــم هجوع.........ليت منهو مات قبلك واستراح.





وقد انتقلت إلى رحمة الله تعالى صباح يوم السبت 30 / 2 / 1429هـ
بمستشفى الملك فيصل التخصصي ومركز الأبحاث عن عمر يناهز
ثمانين عاماً إثر مرض عانت منه ... وقد إخترت لكم بعض قصائدها متمنية
أن تكون عند حسن ظنكم ..

رحـــــــــمها الله ,,

تحـــــــيتي لكم / بنــ ذووق ــت .