رجـم الهـوى اللـي لعـن كوثـر جماهـيـره عــز الله أنّــه مايستـاهـل تـعــب سـاقــي
أتعـبـتـهـا فــــي مـراقـيــه ومـشـاويــره ذي جـرتـي نــازل .. وذي جـرتـي راقــي
لبيـه يـا (ســاره) .. ولبـيـه يــا (منـيـره) في مهبل الناس مدري ويش أنـا لاقـي !!
صــدر الشمـالـي عليـهـن فــك أزاريـــره الـلـي مـــن آدم وحـــوّا مـابـعـد ضـاقــي
جــن المديـنـه عـلـى غفـلـه مــن الـديــره وتـورّطــن بالرومـنـسـيّـه والأشــواقــي
مـايـكـتـبـنّ أسـامـيـهــن بـالـطـبـاشـيـره بيعلمـنّـك عــن الـمـوضـه والأذواقـــي !!
وجيـهـهـن طـالـعـات مــــن الـكـوافـيـره مـن كثـر الألـوان كنْهـا (سبحـة عراقـي)
مـافـيـه داعــــي أجـامـلـهـن بتـكـشـيـره وأقـول مشـتـاق .. لــو مانـيـب مشتـاقـي
ماهن بكفو السهـر .. والحـزن .. والغيـره ودموعي .. وشعري الموزون .. وأوراقي
(كرت أحمر) و (باب طيّاره) و (تسفيـره) فـي (قلعـة الوادريـن) و (بألـف طقّـاقـي)
الهـنـدي و وايـتــه !! والـعــود وبـعـيـره هـــذا مـــدوّر ذهـيــب !! وذاك ســوّاقــي
لـو مـا أنصفتنـي سنيـن العمـر الآخـيـره ماطبّقـت عيـنـي أحـداقـي عـلـى أحـداقـي
قفـلـت سـيـرة عـلاقـات .. وبــدت سـيــره الـلـي عليـهـا الـكــلام وهـقــوة الـهـاقـي
أبرك ضيوف الهـوى !! وأغلـى مساييـره ريحـانـةٍ تقـطـف اللهفــه مـــن أعـمـاقـي
ماهيـب مـن قـوم : (ابـو دقّـه وتسكـيـره) مـن قــوم : (لاحاسـبـت ماتـاخـذ البـاقـي)
لـهــا عـلــى الـزيــن تهلـيـلـه وتكـبـيـره أنعـم مــن الــورده الـلـي فــأوّل السـاقـي
مهـيـب أمـيــره لكـنْـهـا جـنــب الآمـيــره ذات الحسب والنسـب والمستـوى الراقـي
مـن (أغنيـاء الريـاض) ومـن (هواميـره) شركـات أبوهـا بضايعـهـا فالأسـواقـي !!
يومـي لـهـا الغـصـن وتغـنّـي عصافـيـره والأمـــر يـنـقــاد لـرضـاهــا ويـنـسـاقـي
غـيـداءٍ سـهـم عينـهـا مــن قــوّ تـأثـيـره مخـسـرٍ ســوق الأسـهـم عـنـد الإغـلاقـي
الـبـدي والهيـكـل الـلــي مـاتـبـي غـيــره (أصطب) و (أستبنتين) و (قير علاقي) !!
مــازيّــن أخــلاقــي الــطــب بعـقـاقـيـره لــــولا عقـاقـيـرهـا مــازانــت أخــلاقــي
مــن قبلـهـا الـحـظ مــن جـفـره لدحـديـره لـيـن أوعــزت للـزمـان وحــرر وثـاقــي
وأعتضت عن قوم : (ابو دقّـه وتسكيـره) باللـي : (لـيـا حاسـبـت ماتـاخـذ البـاقـي)
الشاعر مدغم بو شيبه