الــدنيا
جتني تشيل عيونها سيوف سلطان
وفي زولها شفت أنتصارات حطين
لا قبلها تمشي عيوني على أنسان
ولا بعدها أنسان يوقف على العين
مدري الشعر ياخذ من النار نيران
ولا من الهيبه غدى اللون لونين
أحمر يشب الليل من فوق الأمتان
نيرانها تشعل ضلوع المزايين
قمرى أتعلق في وسط قلب الأكوان
وأقدامها تبرق على الأرض حجلين
نار أترامح من على روس عدوان
نيرانها تحطب ضلوع الوفيين
تفرح إذا تنحر من الناس خلان
وتحزن إذا يفرح عليها القريبين
تضحك إذا تفرق من الحب أخوان
وتحزن إذا أجتمعو بهواها محبين
بعيونها نهر يصب خلف الأجفان
وعند الهدب تلقى العطاشى كثيرين
فيها بريق القوت يسكن بـتيجان
وفيها أنكسار الجوع وسط اليتيمين
مدري أقول الكون يمشي با الأعيان
ولا أقول عيون تمشي في كونين
بكفوفها سطوة بورايد شجعان
ورمح طعن مليون شيخ وسلاطين
أن صافحت ذنب ٍ يسولف لغفران
تذل عزيز / تعز ناس ذليلين
كفين بعيوني وأقول أنها أكفان
يعني تشوف الموت يمشي بكفنين
تركض وتطرد دينها كل الأديان
ومن وصلها ماتو عليها ملايين
شفت الغني يركض يبي الود ولهان
وشفت التمني يجرح أشفاه مسكين
من قربت سيحت عمري با الأشجان
وأقول عادي دام أنا أنسان من طين
قالت مراحيب الشعر يا بن الأوزان
ضيفك ذبحه البرد دفه بحرفين
ولا أنت بس تشعل قصيدك للأوطان
ما ذقت طعم الحب شكلك لها الحين
كلك شموخ ولا كتب مثلك فلان
وعلان لو يقعد على الحرف قرنين
أدري الصحافه ماذكرت فيك عنوان
بس أنت للأوطان عز وعناويين
عمر الصحافه ما رفعت عالي الشان
وإذا أرفعت ترفع ترى ناس فاضين
من يجهلك يا الحر من دون جنحان
وانت الذي بزهمول عمرك جناحين
عندي ترى تسوى شيوخ وبلدان
من رفعتك قامت شيوخ وبلادين
الشعر له طيب وتواريخ فرسان
وهذا القلم خادم لفعل المياديين
ولا الردى لو يوصف الشعر فنجان
ما تلمس أشعاره صدور الاصيلين
هذا أنا الدنيا وجيتك با الأحضان
قلت أفتنك وتصير ويا الشياطين
حاولت أنا الدنيا على قدر الأمكان
مدري أنا من وين أفتنك من وين
دورت لك مذهب مع كل الأديان
لا أنت مع الدنيا ولا أنت مع الدين
ودريت هذا الصدق لو يمشي بأنسان
ماغيرك اللي صار للصدق رجلين
الـــزبرجد
اذا هالقلب ماينبض معاليقه على الميعاد
أنا وشلون روحي في دروب المجد أصعدها
مشيت ولا معاي ألا جروح ٍ بالدروب جداد
ومعايه شيمة ٍ ترقى على ضلوعي تهودها
صحيح الروح مكسوره ولاتقوى تشيل شداد
ولافكرت أحط روحي على روح ٍ تسندها
رقيت جروح وخليت الصبر فوق الجروح ضماد
أنا لاقلت أضمدها أنا أعرف كيف أضمدها
تثور الخيل من قلبي وأقول ان الهقاوي جياد
وأشوف القلب من دم الجدود يفور يلكدها
يا أما موت من سيف الشعر يحييني للميلاد
يا أما النفس في صمت الشعور تموت وأغمدها
أنا البارح يناديني النعاس ولا يجيني رقاد
سهرت أنوم القمرى على عيوني وأقعدها
من بلاد ٍ قلايدها النجم في جيدها وقاد
وعرفت أن السما تلبس من بلادي قلايدها
وضوى هذا السهر يمشي على هذا الجفن بركاد
يموجني الغلا ويطيح من جفني على يدها
وأشوف الليل يترامى تحت عمري ويصير رماد
وأشوف الضوء يغتال الظلام اللي يسودها
هي الفضه من اللولو على هذا الفضا تزداد
أم أن هذي الرمال اللي ولدتها من زبرجدها
وكاد انها ضوت عمر القصيد ورحلت القصاد
وأجيب أقمار من دمي على فمي وتقصدها
وأصب النبض في قلب البلاد وينبض الأنشاد
ويطيب القلب ويتنفس شعوري من قصايدها
يوديني غلاها وجيت من أقصى الغلا وراد
عليها وجيت أخذها علي ورحت أوردها
أحبك ياعطر عمري وطلعة عمري بالأعياد
أنا همت أكسر ضلوعي في عيدك جيت موقدها
وأقول العيد فيك بخير لأنك خير كل بلاد
وأجيب أيام خير سنين عيدي وفيك أعايدها
لأنك دنية الدنيا ومنك ترتوي الأوراد
لأنك أرض كل الأرض ولا غيرك يوردها
وحتى الغيمه من تلمح يدينك تحضن الرعاد
تبي تنزل عليك من الوله تروي تنهدها
ألا يادار يابنت الهقاوي وهقوة الأجداد
ألا يابنت من روحه فدى عيونك يبددها
عفيفه لاقعد وجه الفجر من خشية العباد
يطيح الليل لارتفعت بذكر الله مساجدها
هي الرفعه من شموخ السجود وجبهة السجاد
أبوها لو يسجدها لوجه الله سجدها
يرتبها الفجر في فوضة طيوره ويبكي بعاد
ويتنهد على شمس ٍ تجي من أصبع تشهدها
وتفوح الشمس أذا قلب المدارس يحضن الأولاد
وبنت ٍ ترمي تلويحة وداع بعين والدها
صباح الشمس يا أرض العزاوي وعزوة الأسياد
صباح الأرض يانور الصلاه بروح ساجدها
يهيلها الكرم من صدر أهلها طيبين أجواد
يشبون الهلا للي يمر والطيب يوقدها
تشوف العز بعيون النشامى يلتفت هداد
شلع لارفرفت كلمة (كفو) يطلع ويظهدها
ألا يادار يابنت الهقاوي وهقوة الأجداد
ألا يابنت من روحه فدى عيونك يبددها
عزيزه حره ماترضى تلامس يدها الأصفاد
تحط الموت في روح الكفوف اللي تقيدها
عنيده لاركبت راس الحرايب تلتهب بعناد
تمر مثل الحرايق في هشيم الحرب ترمدها
أصيله مضمره بالمجد تقود المجد ما تنقاد
تمر مثل الوميض ولا قدرت عيني تجودها
مثل ما مرت وشبت عيوني بداخل الميعاد
انا قلت أشعل ضلوعي من عيوني ... وأعايدها
ويـنك ؟
أقول وينك ؟ ولا القى غير وينك في سكوتي وصال
سؤالي.. غيب شموس الوله حتى انمحى ظلي
ياليت القى عذر حتى ولو هذا العذر دجال
عشان اقدر اطمن مابقى من مابقى بكلي
غيابك يزرع عيون البكا في ضيقة الموال
و ينبت في طرف صوتي سؤال يقول انا من لي
تروح وانطوي كلي مع الذكرى وسط هالبال
توديني التفاصيل الشقيه لك وترجع لي
واقول الحال من بعدك ترى والله ماهي حال
انا الكايد ولكني غديت الحين ياسهلي
انا هذا الطريق المتعب المرهق من الترحال
تعبت ابحث على راحه تمد كفوفها لحملي
سفر هذا الطريق اللي قطع عمري من الاهوال
خلصت ولا خلص هذا الطريق اللي كسر رجلي
اقول لنفسي من تكثر جروحي حل ياحلال
احل ولاحسبت اني ادور حل في حلي
امر الناس في نهر النوايا وضحكة الاطفال
واصب كل النوايا البيض على من يستفز غلي
عجزت استقبل الكره الملون من ورى الاشكال
عجزت ازعل ولو مره ولو بس مره من اجلي
اعيش بعقل واهديت المحبه للبشر بهبال
واشوف ولا بقى حيي ٍ يعيش الحين في عقلي
بقيت انت وبقى ضو الكلام بداخلي لازال..
ينادي يرتعش بأقصى عيوني يقول ياخلي
تعال ارسم على شمس السنين الحارقات ظلال
تعال اجمع بقاياي الجريحه وردها لأصلي
انا ويني اذا راحت عيونك وانتهت أمال
انا ويني ومن غيرك يشيل همومي../ بس قلي
اقول وينك.؟ ويتشظى صدى صوتي بوادي البال
يمر بين التفاصيل الحزينه ويختفي ظلي
حفـيف الـجرح
اشعر بعض احيان عقلي ب مجنون
واحيان انا ألقى عاقل ٍ في جنوني
وأحيان أقول يدين عمري هي غصون
وقت المصافح شفتهم يقطفوني
دايم أردد وسط بالي يمونون
بس هاه.. ماعمري نطقت بعطوني
أرمي المراجل ياعسى فيهم تكون
ولا قد لقيت الا طلبتك تكوني!!
واثر المراجل هم لها وجه وعيون
ماتعيش في شخصٍ ....ودوني
هذا حفيف الجرح من هبت شجون
ولا سقوط وجيههم من عيوني
معقول فوق الجرح دايم يغنون
ولافيهم اللي شاف زرقة طعوني
هذا انا من العام طايح ومطعون
لاالوقت وقتي ولا القصايد لحوني
الحر مكسور الجناحين ومغبون
فوق الكسر مرو علي وألعنوني
يعني أعيش بمثل ماهم يعيشون
لاطعم لا ريحة ولا اللون لوني
الناس صارو اشباح فيني يمرون
يسحبني الأول وعشره اقطعوني
قلت اتعلق بالاغاني على هون
حتى أيتقطع وصلهم في جفوني
الحب يحتاج الى تصليح
ووقفت العمر
للريح
خذه
قبل هذا المسى
ياخذ
عيوني للبشر
واطيح
.
,
نقول بخير
وحنا بقلب طعنات الليالي
ليه
نقول بخير
نخاف الناس تتشمت
أكيد
.!!
واكيد الحب
في هذا الزمن
يحتاج
إلى تصليح
.
.
هو الشاعر يمر باب المسى وتستوقفه دمعات
يفوت بكل أبواب الألم والحب مفتاحه
وغني للمسى والمح كثير من البشر اموات
وتطفو من على صوتي هياكل ليلي واشباحه
اقول الناس !! ولا اسمع تحت هذي السما اصوات
اكيد الكل هو غافي وتكثر فوقه جراحه
اكيد!!/ ما اعتقد/ يمكن/ طبع/ فيني/ بعين الذات
اشوف الناس/ مجروحه!!/وتكون الناس مرتاحه!!
!!
ولكن من فتح هذا الورق بالأه والصرخات !!
ورحت اصعد على هذا المساء وصرت مصباحه
قدرت اشوف /واستكشف،ألم مسكون بالأهات
وعطر للموت وهم يدرون عطور الموت فضاحه
اشوف الموت يجتاح المدينه في هدو وأسكات
واصب صوتي على صمت الظلام واطلق سراحه
.
نطق وايقنت كل واحد في ذاته ينسجن اوقات
و اوقات اللي بقت يطلع يجهز طلقة سلاحه
يارب اشكالهم تمشي على هيئة من النزوات
لانجمه من وفا رحمه تكون بليل وضاحه
هو يعني الناس من تكثر يموت الوصل بالنيات
او الانسان من يوصل عفن نسيانه يجتاحه
.
غريبه ينحدر سيل الدموع ويجرح الأوقات
وكل واحد من العزه يحط في جرحه صياحه
ياكثر اللي نزل يصعد على غيره من الدعوات
ويا كثر اللي من أجل الله على الاخطاء دماحه
اسفرني من ضلوع المكان واخذ النبضات
وارد عمري على عمري ادور للعمر راحه
.
خيالي وين ماودك توديني مع الابيات
دخيلك خذني ياعمر الشعور ونفضة اجناحه
بلا واقع/ وخذني اجمع بعيني ضوى النجمات
خيال/ ولا ابي واقع يطول بالمدى أصلاحه
اشوف اموات/ هياكل/ من على هالارض في خطوات
وكل خطوه قدحت تسمع جدار الناس نواحه
.
.
,
,
غنايه وقف المسرى ولا تصعد على الظلمات
بعد لاتقرب ألباب المسى وبيديك مفتاحه...
.
.
وأكيد
اكيد الحب
في هذا الزمن
يحتاج
إلى تصليح !!
!!!!
طعنات أحبابي
بعد لك وجه تجينـي بعـد ماذوقتنـي امـرارك
ياعمي طير خلاص انسـى ولاتفكـر تطـق بابـي
اخاف بس صج تموت فيني اقول الا انت شخبارك
اقول فارق واخذ كذبـة تمـوت فينـي وتحيابـي
طفى ضو المحبه وأنطفى فـي عمـري مشـوارك
وعرفت اقسى الطعون اللي تجي من خنجر اقرابـي
خلاص الحين بس الحين عرفت شلـون امطـارك
تصب هناك لكل النـاس وتنسـى تـروي ترابـي
تعال وشوف بـرواز العيـون وفيـه انظـارك
هو التذكار مدام انـت النظـر وتجمـل اهدابـي
اشوف بس أخذ الاشواك وغيري ياخذ ازهـارك
ياطيبي كنت احسب الجرح منـك حيـل يزهابـي
من اول تنشغل فينـي وفينـي تشغـل افكـارك
واشوف الحين ماتقـدر تطيـق تشـوف ترحابـي
عمت عين الظما ان كان الظما يترجـى انهـارك
وعمت عين الهوى ان كان الهوى بيشتت اعصابـي
تخاف القلب لا اظلـم غـلاه يمـوت بأنـوارك
أبـد لاتخـا ف متعـود علـى طعنـات أحبابـي
مو مية نار تحرقني بقت هي بـس علـى نـارك
ابشرك مابقى اي شـي تحرقـه كفـو اصحابـي
تجيني ويعني وبعدين شسـوي يعنـي لأعـذارك
تصوبني وترضي كل غـرورك مـن ورى صوابـي
اقول اسكت ولا تكثر تـرى مليـت تكـرارك
طلبتك لين ماجفـت عيونـي مـن ورى اعتابـي
توكل ما بقى لك شي في عمري كود تذكـارك
أو اسمع حتى تذكـارك كسرتـه داخـل أهدابـي
الاصيله
انا من بين كفينك شعـور يشبـه الشعـره
اقولك شي ترى فدوه حياتـي لـو قطعتينـي
اخذت من الصبر لا لا اخذ مني الصبر صبره
مدام بغيبتـك محـد يجـي مثلـك ويحيينـي
تعالي يابعد روح الشعـور ويابعـد عمـره
انا البارح لهذا اليوم ابـد ماغمضـت عينـي
تنفستك شعور وفاح من صدر الغلا عطـره
تنهدتك وشفـت الضيـق يتنهـد عناوينـي
يضيق الكون بعيوني واشوف الكون ثقب ابره
واشوف الموت ياعمري مابين عيونـك وبينـي
كتبتك شوق من شفت الفراق بعمري ياكبره
مو مثل اللي يقول لاانتي ولا غيـرك تذلينـي
مو انتي العز ولو ما انتي اقول انتي ترى وكره
اصيلـه والاصيلـه ماخلـق الله توطيـنـي
واذا ردت على العز الكريم ودورو صقـره
انا ليه احلـف وانتـي تشوفينـه بجناحينـي
احبك ينثني هذا الكـلام ويرتفـع قـدره
احبك يرتعش هذا النجـم يتشكـل بطينـي
احبك نور في هذا المسى واقعد علـى بحـره
احبـك لاتخليـن الفـراق امواجـه تمحينـي
يالله وانتي بعيون المسى بهذا المسـى قمـره
قريبه حيل في اسـود عيونـي انتـي تضمينـي
وبعض احيان تكوني داخل ظلوع الغلا جمره
وكل هذا الوله ماهب من عيونـك حرقتينـي
وبعض احيان تكوني داخل اشواق العمر زهره
عشان الزهره لو بتموت تموت وعطرها فينـي
بغيت اقول شي لكن او انسي بس على فكره
هي الحريه اني اختار قيـدك وادخـل يدينـي
وانا اخترتك وخليني وسط كفينك الشعـره
اقولك شي ترى فدوه حياتـي لـو قطعتينـي
الوقت
حزين ومورقه عيوني دموع ٍ من علـى الاهـداب
يهزهزني الجفا وتطيح دموعـي مـن أخـر اهدابـي
ذبل عمري ولا مرو علـى هـذا العمـر غيـاب
وتتساقط عيون اللي رحلـو فـي داخـل كتابـي
مسكت اللي قدرت اكتب تفاصيله في وسط كتاب
مثـل شـوق المطـر لمـا يعانـق وحشـة ترابـي
اشم الدمع من ليـل المواجـع والسنيـن اعتـاب
وعرفت ان الحنين الريـح وجابـت ريحـة احبابـي
وانا لا مرني لو هو عطـر مـن ريحـة الأحبـاب
ابتسمت وكـل مافينـي يطمـن رعشـة اصوابـي
انا المطفي تحت سقف الحياه ووحشـة الابـواب
مادام ان الوله علـق عيونـي مـن علـى ابوابـي
يجون وأكثري يشعل أمل مـن جمـرة الاعصـاب
يجون ولا لقيت الا الأمـل معطـوب بـأعصابـي
وجوني اغراب وراحو مثل ماجوني بعـد اغـراب
ارحلو من قبل لايطفي العطـر بكفـوف ترحابـي
غريب الوقت او الناس الغريبه بكلمـة الاحبـاب
اشوف الدمع فيهم مثـل ماشفتـه علـى اهدابـي
هدير الماء
للأنهار
حسين / موسى / حابس
/ فايز /مجبل.
..
هدير الماء.. انا.. طيب علامك يالورق ظميان
ابي ترمي القلم وسط الصور وتبلل الحاني
انا ادري وجه كل هذي الصور ياصاحبي ذبلان
ولكن تلقى من باقي ملامحهم ورى اشجاني
تقضب في حبل هذا الغلا ولاتقطع الخلان
وحتى لو نسو صوت الحزن من رنة أوزاني
وزفير ٍ لانفثني رحت أولع صوتي البردان
وصور ووجيه من نار وجمر..فى داخل اجفاني
هنا بنت تبللهاالاغاني وتلبس الالحان
وهنا كنت ارقى من فم الدعاوي فوق شيطاني
وهنا لامرت الذكرى وسط بالي على جنحان
ادورني وسط عمري ولا القى فيني اغصاني
وهنا عشق ٍ يغنيني ويفرد للمسى أغصان
اجي طاير على هذا الغناء يكسر لي جنحاني!!
وهنا ام محاجرها أتشرب من فضا القرأن
قلبت عيوني بعيون العجوز وشفت قرأني
خليط القمح والماء السرابي من ورى الاجفان
أنا هذا الأنا ولاّ معايا واحد ثاني
اجوع وينكسر وجه الاماني واشبع الاشجان
ظما وهذا النهر يجري ويروي اطراف شرياني
اشوف بداخلي طلسم معاني وتمتة شيطان
وعلى الاوراق من امشي اكون بهيئة ايماني
انا من مر من فوق السراط المستقيم الأن
وبعد نشوة حبر تحت الشتايم روح تلقاني
أكون احيان في قلبي وفي عقلي بعض احيان
ولا ادري من يوديني ويوقفني على لساني
انا المفقود من عين السؤال شلون حال فلان
اغط عمري وسط ليل الحسافه بأه والقاني
اقول الدان تتهشم ضلوعي دان ليله دان
وغيري في ألم ليله يصبح من على داني
كتبتك ياتعب عمري ودور لك على انسان
يقط برده ويرميني في وسط البرد وحداني
فصل الفراق
الشتاء فصله يجــي بــعـد الفراق
والحزن غيماته في جبد الوله
الرعــد قــلت الــرعد هذا اشتياق
يضرب عيــونــي وتـدمـع مرحله
ليه راحو ليــه جونــي فــي نفاق
تقــــفي وجــيــه وجــيـــه مقبله
صرت انا خـارج مـداهيل النطاق
ماســـوى قلــبي بيـد ينـي احمله
رغــم وسع الكون اشعر باختناق
كل وجــه فــي ضلــوعي اسعله
ليه كل شخــص يسفــرني بعناق
القى جرحـي بالورق من مـ نجله
شي يطاق وشـي والـله مايطاق
مهــزله فــي مــهــزله فـي مهزله
طعم واحد في حيـاتــك لـه مذاق
أسئـــله فــي اسئـــله فـــي اسئله
الشتاء بقلبـي يجــي بعــد الفراق
ليت فــي قلبـــي حديــهــم وأشعله
ممكنه
وقــف ولا تـرمـي وداعــك بالاعـيـان
محـتـاج أنــا لــذرة امــل فـــي سنـيـنـي
هـذي تفاصيـل العمـر وسـط الاجـفـان
صــوّر وامـاكـن فــي عـيـونـي تجـيـنـي
والله من تطري وسـط عمـر الاحـزان
كـل الـفـرح مــن لــون وجـهـك يجيـنـي
مثل المطر يركض على الارض ولهان
هـــذا انـــت دايـــم بـالـولـه محتـويـنـي
يكبـر غيابـك لـو كبـر وسـط الاشجـان
يكبـر معـه فـي شــوق عـمـري حنيـنـي
المـاي فـي قلبـي مـن الشـوق كـثـران
صبـيـت دمـعـي وشـفـت قلـبـك بيديـنـي
قلت احضنه في وسط يديني على شان
مايلـمـس أطـرافـه حــزن مــن ونـيـنـي
حـتـى ولــو اخـتـرت فـرقـاك عـنـوان
يكـفـي بيديـنـي قـلــب عـمــرك يبـيـنـي
ماهـي حكايـة انــت رابــح وخـسـران
او هــــي حـكـايــة يـاابــيــك وتـبـيـنــي
المسألـه روحـيـن فــي داخــل انـسـان
شفتك رحلت وشفـت روحـك فـي عينـي
غمضت أرد الروح من خلف الأجفـان
عـشـان أصــدق كذبـتـي انـــك تجـيـنـي
الدستور
فـراق وكـان لـه صـوت ٍ يهـز ويفتـق المستـور
يمـر بيـن الحنايـا ويجـرح عـروقـي فــي زلـزالـه
انا المشطور في نصفي هنا وهناك بعد مشطـور
وتحـت هـذا الركـام اللـي بقـى هـو قلـب ب لحالـه
انا كنت اكثرك كنتي اكثـري يااكثـري المهجـور
وتتهـاوى ضلوعـي مــن صفـيـر الـيـل وأغـلالـه
ورحتي والحزن يطحن تفاصيل الصـور ويـدور
ولـكـن مــادرو مــزن الـصـور فــي بـالـي همـالـه
يابنـت الـلا مـدام أن النعـم هـي كلمـة المجـبـور
قوليهـا والبحـر يكسـر شموخـه مـن عـلـى جـالـه
الا ياليـت هـم يـدرون عمـر كـل الحيـاه شـعـور
وان الحـب بالعـاشـق تـكـون البصـمـه فــي بـالـه
يحسبـون الغـلا قتـل وجنـازات المحبـه سـطـور
مـع أن الحـب لـو تقتـل وصولـه يـزيـد بأوصـالـه
أحبك والمدى أقرب من عيوني علـى العصفـور
أحـبـك والـجـدار الـلــي أحـتـوانـا طـــول ظـلالــه
أحبك ينتفض هذا المسـى مـن أول يديـن النـور
احـبـك جــوع ٍ يطـفـي حيـاتـي ويـشـبـع اشـعـالـه
مثـل حكـي النـدى لمـا يعـانـق بالحنـيـن زهــور
فـي قلبـي شفـت قطـرات الولـه فـي عـيـن مـوالـه
أنـا قلـت الفـراق أطهـر تـراب داخــل الديـجـور
وقلت أهدي مـن عيـون الضـوى دمعـات ل هلالـه
ونبت في داخل عيون المسى ضو ٍ من الممطور
وعرفت أن الوداع أزهـر فـي قلبـي قمـرة أرحالـه
الـجــــــراح
عسى ما ازعلتك البارح وزودت الجراح جراح
عسى ما مرت الدمعه على اهدابك من اسبابي
جرحتك من كثر شوقي وخليت الكلام رماح
ولا ادري شلون ياعمري طعنتك حيل بعتابي
بدون شعور صدقني ترى كثر الغلا ذباح
تعال وشوف بغيابك غلاك شلون سوابي
حرام تغيب من عمري وتعطيني الفراق وشاح
حرام الدمع في عيني مناديله هي اهدابي
غيابك يشغل عيون الزوايا وامتلي اشباح
وانا انثر صوتك بقلب المكان واشعل ابوابي
تلفت للأمل دام الرجا في عمري الملواح
اناديلك ولو شرهك وصولك تقطع اعصابي
ابيك الجاي من عمري انا مابيك شي وراح
مدامك اجمل واخر مدامك اول احبابي
ابي ارتاح ياعمري انا ادري هم تبي ترتاح
تعال وقبل ما افرح ترا تفرح بك ثيابي
احبك احبك يابعد عمر الحزن والجرح والافراح
احبك احبك كثر ما نامت عيونك داخل اهدابي
هذا هو اللي تبيه
هذا هو اللي تبيه!!!!!!
اني ارحل من حياتك
وأشعل عيوني بـ ليه ؟
بس خلاص
هذا هو اللي قدرته
قدرك ربي عليه
بذمتك هذا كلام
اني ارجع من جديد
أرجع افرش كل تعب عمري
وانام
هذا هو اللي تبيه
هذا هو اللي قدرته
وقدرك دربي عليه
اني ارحل من حياتك
واشعل عيوني بـ ليه؟
بس خلاص
بذمتك هذا كلام
أني ارجع من جديد
أرجع أفرش كل تعب عمري
وانام
زين لحظه
لاسألوني الناس وينك
وين درو ضحكة عيونك
عن عيوني
سافرت ردت لعينك
بذمتك قول وش اقول
قول قـــــــــــــول
قـــــــــــــــــــــــول قول
الله يخرب بيت بيتك
توني يادوبي بديت
بعت عمري وأشتريتك
خطوه خطوه وأشتريت
توني بأطراف البدايه
مدري وشلون انتهيت
ياخي حس
والله عيب اللي تبيه
أني ارحل من حياتك
و أشعل عيوني بــ ليه ؟
لاجبينك شمس واحساسك مطر
لاعيونك شوق وشعورك دفا
جبت لك بيدي ابتسامات العمر
ليه تكسرها على اطراف الشفا
شوف بعثرني احتياجي بالنظر
شوف وجهي امتلى منك بأفـــــــــــــــــا
ماتجي منك ولكن يابشر
ما انت اول من طعني بالجفا
أبرك ادفن كل جروحي بالسهر
ولا افكر من ورى قلبك شفا
ول ياقلبك مايجيب الا القهر
ول ياعمرك ماعرف طعم الوفا
ولا انا مثل النهر ابقى نهر
من تحوسه ترجع تشوفه صفا
فيني والله أحساس لامنه ظهر
يشعل ظلوعك اذا قلبك طفا
هذا هو اللي تبيه
وهذا هو اللي قدرته
وقدرك ربي عليه
بذمتك هذا كلام
اني ارجع من جديد
ارجع افرش كل تعب عمري
وأنااااااام
وين ..أرووووح
شلون أجيب لقلبي المجروح
رووووح
!!!!!
هذا هو اللي تبيه
كبريت الأصايل
تنام
ويوقظك صدرك
يغني ناااام نااام ناام
تنام
ويوقظك صدرك
على عمرك يمر الحلم وتتشقق بك جفونك
0000000000وتفيض ا بك الوجيه (بلا) ويرفرف فيك كراسك
(وتتخشب) لأحلام السنين ورغبة ظنونك
0000000000و(تتكبرت) بك أطرافك تحكك.. يشتعل راسك
اخذ منك
من جرحك
دم بلادك
وخضب كفها أشعارك
تعيش ==>> تموت أشعارك
تموت ==>> تعيش أشعارك
تكسر وسط شريانك
وتنــاثر داخــل بنيــه
ومتخضبه من أشعارك
تحاول توصل شروقك
وتتعــثر مــن ظــلالك
وتدفعــك بدعاويــها
توصــي تتبع بــلادك
تقولك لااااا
بلادك تتبعك دامك
إلى نـور توصلها
وتتبخر
وتصــب نفســك
عـلــى بـــــلادك
تنفي وجيه وتنفي داخل البال
...................فيك يتمرّغ طيب يطفي عفنها
مزتك عبره ومتلى فيك موال
.............. ودها تكنك .. تكفا ياخوك كنها
كسرت روحك تبني لغيرك ظلال
.............بك خانت الأرواح يا حسين صنها
يا حسين مايشكي من الوقت رجال
..............أنا أعرف أرجالٍ شكى الوقت منها
النفس مهره وموتها طرد الأهوال
.................أبلا رسن تطرد وغيرك رسنها
لو لـ النوايه وجيه يا طيب الفال
.................تيقن جميع الناس ويموت ظنها
ريحت فعلك وأركضت فيك الأقوال
................. لو أطعنتك الناس فعلك طعنها
متأقلمٍ بالوقت ياخوك الأنذال
..................والأ الأصايل أشهد أنك كفنها
أزوال مرينا ........ومرتبنا أزوال
............... لا ثمنتنا .....ولا عرفنا ثمنهااااااا
مر الزمان وشفت أنا ألوان و أشكال
.................بالوقت شفت الناس تلعن زمنها
وشلون عاقل يحسبك أنت رجال
................ونفسك بها مليون فارس سكنها
تعلم تحمس رجالك
قبل لاتصافح دلالك
قبل لاتشرق
بحثل الوجيه المعفنه
ياخوك وتتعلم
تعلم
تم ي ي ي ي ل
يعدلك شانك
اصحى
تنام
وقلب يصحى بك
قصيدي وان سجا يقعد نعاسي بأول أنشاده
0000000000ألين أشرب تناهيد المساجد ثم أقعدها
صباح البنت لا شعشع فضاها من سنا قلاده
0000000000صباح النبت لا مالت شموس وهب ناهدها
يروح الشاعر لقبر القصيده بروح ميلاده
0000000000ويدفن روحه في قبر القصيده ثم يولدها
وتتنفس هوى الحبر الطهور وتنفث أبعاده
0000000000ويقطع من حزن موته مزن صوته يمهدها
يهزهزها على جرح الصهيل وترمح أعناده
0000000000ويشعل هقوة ٍ تنثر جمر في كبد ناقدها
تمز الروح وتكن الولد في قهوة أجداده
0000000000تصبه طيب لاعاث النذل بدلال قاصدها
فضاها حمحم الهيل العتيق بدلة أجواده
0000000000ظماها تمتم الشيح العتيق بظل جاحدها
تجي أرحم من الدمعه بنفس الوقت جلاده
0000000تجي بأجهادي مطواعه تجي مطواعه وأجهدها
تجي دموع ٍ من عيون الصلاه بروح سجاده
0000000000تجي عيون ٍ من دموع الصلاه بروح ساجدها
مثل طفل ٍ يحب أمه تحت تكبيرة أعياده
0000000000تفوح أمه رضا لا شب حنينه من يعايدها
مثل قرم أستظل بدلته والشمس وقاده
0000000000ويغمس كل فناجيله في صدر الشمس يوقدها
عليها الله إذا شافت صدور الأرض نهاده
0000000000تصب الأرض في فم السما تروي تنهدها
تطق الغيمه لو حتى المطر ماطق ميعاده
0000000000تطق وينثر أطفال المطر سكين راعدها
شريت النفس أنا أدري هم يجون أكثار زهاده
0000000000ونفسي لوتبيني أشري لها والله لجلدها
عبدت الله من شفت الدينار وشفت عباده
0000000000عبدت الله من شفت الحريم وشفت عابدها
عبدت الله من شفت الأصيل إن خان بجواده
0000000000عبدت الله من شفت الحياه تدوس سيدها
ياحزينه
جيت أشحذ بالمدينه
في عيوني للنوافذ
من يخمرها مسى
حتى يخبزها صباح
فارد عيوني عسى
ألقى نكهه للجراح
دحرجتني الشمس حتي
شافو أحزاني غروب
وأخمدو كل النوافذ
وأفتح لحزني دروب
حتى أوطا وجه باكر
وأتدحرج للغروب
ياحزينه
كيف أحاور هالمدينه
هي تحاورني بموتي
إني أكسر ما بصوتي
أولا كسر الرجوله
ثانيا كسر اللي أقوله
ثالثا آآآآه ياللعين
إني أِشكك باليقين
رابعا علمي بها يوم لها
قلت تهبى
هي تبي تعطي الحياه
لكن بأطباق صوتي
مايكسر ما بصوتي
إلا موتي
إلا موتي
إلا موتي
كل الأشياء بي تسافر
ما تهاجر
الربابه والذيابه
والفيافي اللي
قطعها صوت جدي
والقرابه
والصهيل اللي يغمسني
في عتابه
والرحيل
وقرقعة صوت الرحيل
من تهاجر عن حناجرهم
سحابه
والنفل ويا الخزامى
والصقور
والحريم اللي لبست
جلد النمور
والأناشيد بنجر
لاغسلت وجه الفجر
(والرعوجي والعواجي)
والبشوت
ومجلس ٍ فيه
((محروت))
كل الأشياء بي تسافر
ما تهاجر
ما تهاجر
ما تهاجر
ياحزينه بالمدينه
كل روح ٍبي تنام
توقظ بصدري سهام
رغم أني لي قلب ٍ
كل مارفرف خصام
يورق ظلوعه سلام
شاعر وتنبض خلوته طهر وصلوات وعباد
0000000000ماقد تميع حشمة ٍ للي هدته قيادها
شامخ وربي مانفتح صدره لك إلا يالجياد
0000000000وماخلقت كفوف ٍ تدق في ظله عفن اوتادها
من لابة ٍ هي نارها تزفر ولا تنجب رماد
0000000000وشلون تطفي ياخبل لابه حطبها حفادها!!
غبت أتشرد بالورق أبني من جروحي بلاد
0000000000مثل العزاوي لاحرقت دم لهقاوي جدادها
في ناس تمشي بيننا فقر ودقايقها جهاد
0000000000أف من شعور ٍ مافتح عينه وشاف جهادها
وفي ناس نور وجيهها هو سر طاقتها السواد
0000000000بالوجه نور وبالصدر جثه عتقنا حدادها
وفي ناس نور وجيهها من الرحم حتى المهاد
0000000000ماترضع الظلم العفن لو الدهر جلادها
أشوف من فينا عثر ويقول اهي كبوة جواد!!
0000000000ابك الأصايل ما كبت إلا برداة أسيادها
لو الأوادم مثله ومتعاند باسم العناد
0000000000كان القبايل ما سقت رحمه بصدر أحفادها
أشعل قصيده بالمسى وأشم خيانات العباد
0000000000وأطفيها في جوع النسى وأبكي على أولادها
تنام
ويوقظك صدرك
يغني ناااام
نااام
نااام
نااام
تنام
ويوقظك صدرك
يغني ناااام
نااام
نااام
نااام
الطيف
تجيني طيف ياعمري على جنحان شوقي لك
أخاف أرمش من عيوني وأبعثر جية وصالك
حبيبي لا تجيني قول وين أنت وأنا أجيلك
أبيك تقول وين أنت وعلى عيوني أنا اسعى لك
وربي فوق روس الشوك لخلي القلب يمشيلك
وأخلي ظلالي يسبقني قبل يحضني منزالك
ثواني بس أبي أتهندم من عيونك وأبي أهديلك
في عينك ضحكة ٍ حتى تكحل عين عذالك
يقولو الناس بغيابي تشب القلب ويضويلك
حنيني..من وهج شوقه يميل القلب لامالك
قضى دمعي من عيوني أبي من عينك أبكيلك
أبنثر من ورى عيوني دموع عيون ترحالك
تعبت أهرب من الأشيا البسيطه من تفاصيلك
تعبت أسأل زوايا البيت عن أول وأخر أحوالك
وحتى الشوق من صبح الدرايش قام يهديلك
عصافير الرضى ترفرف على بيبان مدخالك
هنا ترمي صباح الخير قبل لاتروح وأدعيلك
وهنا تضوي مساء الخير في عيني من هلالك
أنا من الليل يقطفني شعوري لك وأغنيلك
أنا من الصبح يليلني الحزن زمن لون موالك
حرام الليل ماهو ليل أذا ماكنت في ليلك
وحرام الصبح ماهو صبح اذا ماكنت بظلالك
تروح وقلت أحط روحي على كفي وأناديلك
نزعت العمر من شفت الغلا بالروح نادالك
بربك قول وش سوى الفراق بوجه منديلك
تسيل ألوان طيفي فيه ألا من البكا سالك
حبيبي لا يبكيك الفراق ولا يهد حيلك
أخاف الدمع من عينك يجفف صورتي بالك
تعال أحتاج اسولفلك عن الأيام وأشكيلك
وأفض غيم الحزن وأنثر حنين الشوق بقبالك
تعال حط في قلبي هموم الفرقى وأشيلك
لأن القلب ماهو قلب أذا في نبضه ماشالك
وقف دمعي من ذعيوني أبي من عينك أبكيلك
أخاف أبكي من عيوني وأبعثر جية وصالك
دعوة الغفران
مو معقوله تجي منك وترميني لاي انسان
يلملمني ولا يلقى بعيوني غير دمعاتي
انا ماصدق انك انت تنهيني من الوجدان
وترميني وانا اشوف القبر نادى مسافاتي
وكسرني الشتاء ياوليد وانت بداخلي دفيان
تحملت الاسى والظيم عشانك يابعد ذاتي
وصحى بي البرد واللاهوب وانت بداخلي غفيان
تحملت السنين وقلت على الله تلملم شتاتي
انا امك ياهيــــــــــــــــــه امك حملتك والعذاب الوان
ولدتك والالم سكين يركز داخل لهاتي
وانا اثناء الوالده من بكى صوتك طعنت احزان
لاني شفتك بصوتك تنادي كل طموحاتي
ومهدتك فعين وعين يشرب حزنها القران
وهزيتك وكان النور يتهزهز من دعاتي
اضمك في يديني لاتجي وتقول انا بردان
تركت البرد لضلوعي رح انشد رعشة شفاتي
وزولك من ركض فيني لمست بداخلي اوطان
وتركتك تبني بمجدك على كتف انكساراتي
وتذكر يوم مدرستك صدى وكفوفنا الحرمان
وكانت رنته من فلس خنقته لك بشيلاتي
كبرت وصرت بعيوني شجاعن واشهم الفرسان
وحلفت اني على عرسك لارقص كل شيباتي
اسولف للبشر عنك اقول ولا به اي نقصان
رضع عز الشهامه شب طموحه في معاناتي
وله شان الصقر لا لا اخذ منه الصقر له شان
يجي مثل الوضوء لاطب حنينه فوق راحاتي
يقولون الولد هو خان اقول وليدي لا ماخان
وهم يدرون ماغطى منامي غير وناتي
افااااااااااا وشلون تتركني يكحلني عمى النسيان
وانت ادري فيوم الحشر جنه تحت خطواتي
لك الله مانطق صوتي لك الا بدعوة الغفران
ولكن خوفي من حزني ومن دعوات عبراتي
تدين اليوم ياوليدي وباكر للاسف تندان
ويرمونك مثل امك وتذكر حلم شيباتي
على كتاف الرجاجيل نايم
شفتك على كتاف الرجاجيل نايم
وشفتك مغطى بالعلم قلت بردان
يبه هو حزني داخل القلب حايم
قلت أشعل دموعي وأخليك دفيان
صوتي يبه من بين الأحزان عايم
لو أصرخه تهتز من حولي جدران
أخاف تقعد يا يبه وانت صايم
وإنت قلت قعدني على صوت الآذان
تعبان ؟؟ تعبان أدري والتعب فيك دايم
تفرش ضلوعك حب وتكون تعبان
للحين جسمك فوق الأكتاف نايم ؟
وانت الذي قامت على أكتافك أوطان
إنت العزيمه لي حكوا بالعزايم
يا ما شعلت النور في ليل الأحزان
حتى الرمل في دفنتك صار هايم
من كثر ما وجهك يشع نور وإيمان
تنزل في قبرك والدعاء فوق قايم
كل الاوادم صاروا قلوب ولسان
يالله يالله ترحم منهو طفا الظلايم
اللي شعل عمره وسط عمر الإنسان
مرثية الأمير جابر الاحمد
يااطيب قلب انا وشلون أطول القلب وأكتب لك
قصيدة من حزن تشعل حنين الأرض مـن شانـك
عجزت اسهر على المعنى احاول بـس اعبرلـك
عن شعوري وعن احساس الحزن في عين خلانـك
لو ان هذي النجوم قلوب صعدت بعيني واقطفلك
سناها واشعـل الدنيـا قلـوب بليـل فقدانـك
ياشيخ الارض وشلون الشعر من قلبي يوصلـك
وانت الشعـر والمعنـى وكـل الحـب بأوزانـك
وشعري لو ظلم عمري انا ارضى بس من عدلك
لأنك من عدل بين القلـوب بوسـط وجدانـك
اقول الحب هذا الحب لو هو انسان يشبـه لـك
وانا اصلا من عرفت الحب شفته بهيئـة أنسانـك
وأقول العز والمجد القديـم يضيـع مـن أجلـك
نعم مدام هـم عاشـو سنيـن اطـوال بأعيانـك
انا ما اقول من ترحل بكانـا بـس يدمـع لـك
أقول الله يعين عيـون تشـوف أجـدار دسمانـك
هو اكثر من حضن قلبك بهالدنيـا ويشهدلـك
بأن ياما زرعت الحـب والرحمـه مـن احسانـك
اذا ترحل تشوف أصوات كل النـاس تندهلـك
لأن قلوبهم تنـزل معـك فـي داخـل اجفانـك
ذخرت الحب ياجابر واشوف النـاس تذخرلـك
بكا مرفوع من صوت الدعاء يصعد على شانـك
تفارق فينا مو/ عنا وهـذا الشعـب يذكرلـك
بأنك واحد وتجمـع قلـوب الشعـب بأكفانـك
نعم حنا الفروع اللي تقـول ونجتمـع بأصلـك
رويت الارض وهم حنا ارتوينا بطيـب شريانـك
ياشيخ الارض مدام ان الشموخ يكون من فعلك
وهذا العز من تحت الاراضـي يكـون عنوانـك
لابد أنكون فوق الارض نمشي كلنـا بشكلـك
على نفس الشموخ ونفس طيب افعـال جدانـك
ديوان سالم سيار 
العرض العادي
