الكتابه هم

يا قصيدي طوّل الشـوق اغترابـه
ما شهد قافك على همـي وغمـي
جيت أفرّج بعض همـي بالكتابـه
اكتشفـت إن الكتابـة كـل همـي
للسؤال المر فـي صـدري إجابـه
وقبل أنادي صرختي تذبـل بفمـي
أقدر ألبس عمـة الشيـخ وثيابـه
وأظهر التاريخ من جيبـي وكمـي
للوجيـه اللـي ملامحهـا تشابـه
قام فعلي وانحنى مدحـي وذمـي
قبل ما أوصل سرّها واكشف حجابه
كيف أميزّ وجه أخوي من ابن عمي
الكريم اللي عطا صافـي شرابـه
في مشاريبـه دوا قلبـي وسمـي
يحسب إن الصيد في مروة غرابـه
لا يطيـر ولا يـهـد ولا يـدمـي
خاب ظنه وأمطرت بأرضي سحابه
وانبتت من كل عشبه ويش آسمي
وقيظه اللي تـوّه ركابـي سرابـه
راح يمـه والربيـع انحـاز يمـي


صباح النور


هربت من الزمان اللي يسمونه صباح النور
وزبنتك يا الظلام وستر مجروح الزمن ثوبـه
لقيتك ماسمعت احلى النصايح والعتب والشور
على زين النهار اللي لقيت اشتقـت لغروبـه
تجاهلت الشموس ولاالتفت لنورها المنشـور
وتلقيت الطريق المظلمه دوب القـدم دوبـه
حسبت خطاي وعيوني مداها للعصى والسور
صحيح الشوف لكني خذيت من العمى اسلوبه
انا لي بالعمر مبدا ثبت بي والسنيـن تـدور
ملبسني لباس المنتصـر والنفـس مغلوبـه
يجملني بضحكه في صداها خاطـرٍ مكسـور
يغني في شمالـه والدمـوع تهـل لجنوبـه
أنا خصمي زمن واقوى سلاحي حظي المعثور
اسوق به الركاب محملـه وتـرد مسلوبـه
يعاند غيرة ٍ فيني ربت صدق وثقه وغـرور
تسامت في زمانٍ يفرش الهامـات لدروبـه
أدوّر للوجيـه المقبلـه وجـهٍ حيـاه يثـور
ابي منه احتجاج على الزمان المر وعيوبـه
تهجيت الملامح والسطور اللي قريت سطـور
طريق ودخلتني في قيـود الذنـب والتوبـه
تصدد بي عيوني من حياها والدروب سفـور
توريني وجيه في زوايـا الذنـب مصلوبـه
تقلبها اليدين العابثه كـن اليديـن صخـور
عليها ذكريـات مؤلمـه بالدمـع مكتوبـه
أنا وشلون ابستوطن رحابك ياصباح النـور
وانا فيني وطن ينزف قبايل دين .. وعروبـه


متعب الخطوه

يامتعب الخطوه على الدرب لاهنـت
وشلون تحزن والشمـال بجهاتـك
جرب تمارس ضحكتك وين ماكنـت
واحزان عمرك سترها فـي عباتـك
الريح قامت وانحنت وانـت ماقمـت
ياحـي لاتنهـار قــاوم وفـاتـك
تبي ترد الريـح وتبعثـر الصمـت
ان مالقت بك روح شالـت رفاتـك
ياكبرها لاصاح داعيك وين انـت ؟!
وجا ينتخيـك ولالقـا الا عصاتـك
أدري وصلت آخر مدى الصبر وتعبت
مابه نكد فـي رحلـة الهـم فاتـك
وانا بعـد خاويـت الايـام وندمـت
الله كـم تشبـه حياتـي حيـاتـك
هذا زمان الهم .. والفقر .. والكبت
ماهو زمن سم .. وتدلل .. وجاتـك
اما انت في واقعك سلمـت وآمنـت
والا اعترضت وعشت في ذكرياتـك
يامتعب الخطـوه بوجهـك تمعنـت
لونك ظهر لي وادهشتنـي صفاتـك
لـو المرايـا منصفـه ماتلـونـت
كنت ابيض ٍ من مولدك لي مماتـك
بعض المرايا تعكسك مثـل ماانـت
والا بعضهـا مايـوريـك ذاتــك


رساله الى حواء

هذي حياة آدم ثقه .. صبر .. تشكيك
ياعيـون حـوا حاولـي تفهمينـه
من بعثرة كينونتـه لمسـة يديـك
مشغول يبني مـن خرابـك مدينـه
من داست ظلوعه ورا التوت رجليك
حتى رجعتي مثـل مانتـي رهينـه
ماهمـه الا انتـي يهـدك ويبنيـك
قصرٍ مهيب .. ونصبـك تحكمينـه
خاض المعارك واستلب لك مماليـك
من شان في حظرة هلـك تمدحينـه
سج الفيافـي وانتمـى للصعاليـك
قـاف تمنـى تلبسـه كـل زينـه
ياعيون حـوا دون هـذي وهذيـك
آدم بحـر وانتـي مجـرد سفينـه
حلمك سرق موجه وهو يرتحل فيك
يضحك بوجه الريح وانتـي حزينـه
احيان يلبس حاضره ثـوب ماضيـك
ويعـاف وجـه للغـلا تلبسيـنـه
يكبر .. ويرجع طفل من شان يغريك
تدلليـه بقبـلـة فــي جبيـنـه
آدم يبيع آدم علـى شـان يشريـك
هابيل حتـى اليـوم تبكـي يدينـه
ياعيون حوا كـل ماصـار يفديـك
بس اقبلـي هالوضـع لاترفضينـه



غرسة الريحان


ياغرسـة الريحـان كـل الغـرس مـن حولـك ذوى
وحدك بعد هاك الربيع اللي يفاخـر بالخزامـى والنفـل
من عاطي اغصانـك ولـد نيسـان .. والـذاوي روى
لولاه مارديت اغني عقب ماقلـت الغنـا عيـب وجهـل
لـولاه كـان فـلان مثـل فـلان : فلّـس وانــزوى
ليله كحل مزعوم ونهـاره عيـون ماتعـرف الا تمـل
عطرك نهـار الليـل مـا غيـره مـن الوحشـه دوى
لاحل في روحي تسامت من عذابـات الغـرام المبتـذل
استاذنه من ( وادي الفيروز ) واخرج مـن ( طـوى )
طفل بري من كل مايطري على بال الصدف والمحتمـل
لوبيدي امحي مـا كتـب عمـري ومـا الـراوي روى
وابدا من اغصانك حكايه ما تليـق الا بقديـس وطفـل
طالـت مشاويـري وعثـراتـي وكـثـر المحـتـوى
ما صرت اميز في الدروب اللي تشمت بي من اللي تحتفل
مـرات ابيـت فـي هجـاد الذيـب واعـوي لاعـوى
ومرات ابيت في قصور ماتزيـن الا اذا السـاري ثمـل
تلعـب بـي الصدفـة والاعبهـا ونتمرجـح ســوى
ياما جرى مابين هم الفيلسـوف وهـم شعـار الغـزل
درب مشيـتـه لاضـيـاع ولامـجـون ولاغـــوى
طيرٍ يبي لثم السحاب ورده السافي يخب علـى الرمـل
ماصادنـي صيـاد غلطاتـي .. ذبحـهـا واشـتـوى
سبحانه اللي طول الرمثه وخلاهـا تعـذرب فـالنخـل
مـن برقـع الشاهيـن فـي شبـاك ملعونـة ثــوى
ناقص يصارع عقدته ما شاف حـر الا يحـاول يكتمـل
ياغرسة الريحـان فـي صمتـي صريـح الـى نـوى
خلا الوجوه الخافته من ذلة التابـع تثـور .. وتستقـل
تعرفنـي الفضـة وانـا اعرفـهـا لـكـلٍ مسـتـوى
لو غرت المكفول ماغرت سليـل الدرتيـن / المكتفـل
باكـر الـى طـاح الشـراع قنـاع والظـن اللـتـوى
ضاعت علوم السندباد ورد للصحـرا يـدور لـه جمـل



سقوط


ديرها مغنى ترى صاحبك راعي هجـوس
شاعرٍ لاضاقت الارض في عينـه قصـد
طول الليل التغلي وطـال بنـا الجلـوس
ياتـرى ثمـلـت فناجيلـنـا ولابـعـد
سالفتنا عجزت وانحنت ماهـي عـروس
احملت عشريـن مـرة ولاجابـت ولـد
ثوبها يستحضر اللون في كـل الطقـوس
جاهز للضحـك الازرق وجاهـز للنكـد
كان عندك كذبـة ٍ ماتعريهـا الشمـوس
خلنا نبني بها فـي مـدى الصحـرا بلـد
غيرنا يبني مداين على روس الطعـوس
وان سألته قال الانسان يخلق فـي كبـد
حلمنا مقتول والقاتـل ايمانـه غمـوس
أي حلـمٍ نرتجـي فزعتـه وايـة وعـد
كل عام من اوله نشعـل الظلمـا دروس
والغريب ان آخر العام ( لم ينجح .. أحد )
لاتفاءل وجهك المنتظر وجهـه عبـوس
مثل وجهك ماعلى نظرتك فـال السعـد
من زمان ونحلتك هايمه بيـن الغـروس
لجت الرمان من شان تجمع لـك شهـد
مشكلتها حظها يشبـه لحظـك نحـوس
كلما جت عين زهرة لقـت فيهـا رمـد
شجرة الحظ ايبست عودها مليان سـوس
لاتـداوي يامـداوي ولاتشكـي لاحــد


مرجحه

حولين واكثر وانا واقـف بخـط الـزوال
والريح تاخذ من اغصاني ثمـر واجنحـه
اشرب هجير القوايـل واحلـف انـه زلال
والشمس تشرب دمـي عـذبٍ ولاتمدحـه
شجرة طريق الثمر والعـود منهـا حـلال
بلاش .. واللي بلاش الفوز بـه مربحـة
من مر حافي خذا منهـا عصـاة ونعـال
يقطع ويجـرح وهـي تـدراه لاتجرحـه
طول ثيابي ومرجحتـك عبـث وارتحـال
في هالقسـا ماحلمـت بغيمـة ٍ مفرحـه
ان شفت خيل العواصف قلت هذا ( احتلال )
وان هونت قبل توصل قلت لا .. مذبحه !!
نسيت كيف اشرح الرمضا بعشب الخيـال
الواقـع اللـي تشربتـه محـال اشرحـه
نسيتنـي سكـر الجابـه ومـر السـؤال
صوتي " نشز " مكرفونه وانطفى مسرحـه
لـك نيـة لاجنوبيـه ولاهـي شـمـال
وتقول باب الظنـون السـود لاتفتحـه !!
ظلي كرامه ودليتـه مـن اجلـك حبـال
وكل من تمرجح يقول الشمـس لاتلفحـه
المرجحـه ماتكفيهـا حــدود الـظـلال
والظل محتار كيـف يلاحـق المرجحـه!


غيمه


اضحك يصير الحزن عـاده قديمـه
ماتطري الا مثـل مايطـري العيـد
اضحك تصير اقبح همومي وسيمـه
وابخل يدين الوقت فزعات اجاويـد
لاتخفت الضحكـه تراهـا حشيمـه
في شالها غيمـه تلـوح لهالبيـد
محتاج لي فرحـه تعـادل هزيمـه
محتاج لي خطوه تمرد على القيـد
كم لي مقيـم وهالموانـي مقيمـه
والبحر ماينقـص ولااظنـه يزيـد
حلمي وحلمك مثـل عقـد ويتيمـه
مايلتقـون الا بشوفـه مـن بعيـد
مابيدهـا تختـار للعقـد قيـمـه
ولابيـد العقـد يختـار لـه جيـد
اضحك وخل الحزن يندب هشيمـه
ماعمر يابس يرجع اخضر من اجديد
لك ضحكة ٍ مثلك .. ذرابه وشيمـه
دايم تجينـي فـي زحـام التناهيـد
ياما سرينا الليـل كـاس ونديمـه
اجرهـا مـن يـد وتجرنـي بيـد
نجلـس بريـح ماتبشـر بغيـمـه
نقطف مواعيد ٍ .. ونغرف مواعيـد


سيرة العشق


ياساحل الملـح مـل البحـر هالسيـره
الـى متـى والمراكـب تعشـق المينـا؟
قديـم هالعشـق لــو لـنـا غـيـره
نبـي عـلـوم تضحكـنـا .. تبكيـنـا
ليت المراكـب تشـوف لعشقهـا ديـره
غيـر الموانـي ودمعتـنـا واغانيـنـا
سمج الحديث الطويـل وطالـت الحيـره
الريـح مـاهـي بـيـدك ولابياديـنـا
الى اقبلت حيهـا والـى ادبـرت خيـره
حنـا علـى ساحـل القسـوه تربيـنـا
خل الزمـن صلـب لا ترحـم مقاديـره
افراحـنـا مابـعـدهـا الا تعـازيـنـا
يالساحل" العذب" صـار التبـر قصديـره
انـس الطفولـه واغانينـا واساميـنـا
صدق التقينـا وكـان الحـب : والغيـره
بــس افترقـنـا ولكـنـا تلاقـيـنـا
شاب الزمن فـي يدينـا وانحنـى طيـره
واسطـوره البحـر تفنيـنـا وتحييـنـا
شاب البحـر كبـر ماشابـت اساطيـره
مليـون عـام انتـوارث رعبهـا فينـا
والشمس مليون عـام تعيـد هالسيـره
تشرق على " تدمر " وتغرب على " سينا "


بروق


شمال والليل اشتعـل رعـد وبـروق
وتقول وشبـك ماتزيـح الستايـر ؟
حتى المطر يا" هند " ماعاد لـه ذوق
طعمه تغير .. مدري اشلـون صايـر
مابينه وبين اتعـس احوالـي فـروق
مثله مثل طعـم السهـر والسجايـر
كان الظما قلبي.. وبرق المطر شوق
يلوح واصعـد لـه حمـام ومنايـر
واعل واشرب قـد مافينـي اعـروق
والزايد اغسـل بـه ذنـوب الكبايـر
اول وعين الصـب حاجاتهـا فـوق
كان ابتهاله " تحت " مجنون .. ثايـر
زمان نخلي لاوعد صيـف بـعـذوق
تسكـن ريـاح ايلـول حتـى ينايـر
زمان ياهند المطر صـده " عقـوق "
فتنتة غديـر يمـوت فيهـا عشايـر
واليوم في هالجـدب مـادور حقـوق
ارسـم ضياعـي مستطيـل ودوايـر
في قصر ماله سور .. مدري بصندوق
والثانيـه تقـراه عـيـد وبشـايـر
واسمي مقابلني على الرف مشنـوق
جذعه تصلب موت والغصـن طايـر
بعضي سجين يدي والبعض مسـروق
ظـلام سجـنٍ مـا يضويـه زايـر
ان كان ليل البرق يعني لـك شـروق
طلي يصيـر البـرق خيـل وظفايـر


شموخ


لا الناي صوتك ولا شمس الضيا زولك
لولا شموخك.. تصير بناظـري عـادي
لا تنحني.. لا تهـل وتعشـب سهولـك
ويربع اللي سكـن بالضلـع والـوادي
خل الخطى تنتحر فـي درب مجهولـك
انا قوي حيل.. واجمل طبعـي عنـادي
انـا اتلـذذ بهـمٍ يثمـر اوصـولـك
بعض الهموم اشتريه براحـة اعيـادي
ان ما جوادي يغير.. ويهـزم خيولـك
سلمته الريح.. ما اعده مـن اجيـادي
وان ما رماحي تصيب وطولها طولـك
ابا اترك الغزو واطوي صفـة امجـادي
واعيش مثل البشر: (عادي على قولك)
الناس ماهم عبيـدٍ لـي ولا اسيـادي
دامك قمر والنجوم تدور مـن حولـك
تأكـد انـك بعينـي: ظاهـرٍ/ بــادي
دامك بعيد المـدى والنـور مرسولـك
انا على ضو نـورك.. مقبـل وغـادي
وان صرت (عادي) وكلٍ يقدر يطولـك
هونت.. ما هو بـأنا اللي يطرد العادي!


لايرحم الله فوج!؟





في الذاكرة "ليلى"و"مالك"و"هـداج"
وأبيات مجنـونٍ جنونـه صراحـه
جا يشتكي همه لسكـان الأبـراج
وإلتموا أهل الفلسفـه والفصاحـه
قالوا عرب .. والقول مايرجع أدراج
يمشي دروبه عـوج والا سماحـه
لايرحم الله فوج من ذيـك الافـواج
ولايرحم الله طيـر يرخـي جناحـه
راحوا وصاروا سالفة كـل هـراج
والمقبليـن اشـد حمـق ووقاحـه
ياسيدي كيد العـدا وارفـع التـاج
أنا لهـم خصـمٍ جنـوده رماحـه
ياسيدي دون النظر رمش وحجـاج
تحميه من عج الطريـق ورياحـه
دون الكرامه من دمي سيف وسياج
والفارس اللي مايخونـه سلاحـه
باصبر ومثلي لأجمل الصبر محتاج
ماتقبل الدنيـا علـى كـف راحـه
قررت اغامر واخجل الشمس بسراج
وأخلع عن اللون الرمادي وشاحـه
ياسيدي والصـدق للقلـب منهـاج
لو ما يحبك مـا أفتـداك بجراحـه
ما أبيك تلحقني على سيف الأمواج
ماينقـذ الغرقـان جاهـل سباحـه



ماتشبهك ..أو تشبهك

رسمت لك ياعذبـة الصـوت صـوره
ماتشبهك ..أو تشبهك صورة انسـان
إنسـان غايـب واحتوانـي حضـوره
ميزت لونـه رغـم تعتيـم الألـوان
في داخلـي موجـود صافحـت نـوره
واعجزت الا قي له على الارض عنوان
نذرت عمـري رحلـة فـي عصـوره
ادوره بيـن الأمـاكـن والازمــان
من غيبته في الوقـت حتـى ظهـوره
ابا انشـده فـي كـل روحٍ ووجـدان
باهيم واظما فـي صحـاري دهـوره
حتى يقابلنـي وانـا حيـل عطشـان
إنسـان فـي دمـي غـلاه وجـذوره
من جـدي وجـده ويعـرب وقحطـان
له فـي زمـان الشـك روحٍ غيـوره
يزعل على شانٍ ويرضى على شـان
ماهـو كمـا خبـلٍ تبلـد شـعـوره
عنده خطـا الايـام والصـح سيـان
ياعذبـة الصـوت الزمـان وقشـوره
خلتني اتحسـف علـى كـل ماكـان
عمري كتاب:الوقت يمحـى سطـوره
والمشكله مالي على الوقـت سلطـان
ينـزف قصيـدي واغرقتنـي بحـوره
والشعر ما مجدني فـي كـل الاحيـان
والساحـل المهجـور ماتـت طيـوره
لاعانقـت زهـره ولاغنـت الـحـان
عيا الربيـع الطلـق يطلـق زهـوره
وعيا الخريف يحل مأسـاة الأغصـان

بحر الجنون

ياغايبه لوغبتـي الدهـر كلـه
بيني وبينـك يـوم لابـد ياتـي
كني اشوف ارموشك المستظله
تضحك تهنيني بلحـن اغنياتـي
ياصامته والصمت هـذا مذلـه
الصمت موتي والقصيده حياتـي
جيتي وانا اضيّع طريقي وادلـه
ورحتي وانا متورطٍ في شتاتـي
عطشان والصبار محدود ظلـه
وش لي بظـلٍ مايبلـل لهاتـي
خاويت هالعالم على كـل ملـه
ولالقيـت اللـي ثباتـه ثباتـي
أول قـدوم وجيههـم مسفهلـه
والى أدبرت صارت بلون العباتي
ياغايبه لو لي مع الوقـت ذلـه
عاتبت وجهي لين ترضى جهاتي
كني صدوق وعالم الصدق قلـه
ياغربتي ضاع الطريق وعصاتي
كني ملـول وذكرياتـي مملـه
وشلون اهاجر من زمن ذكرياتي
عمري شقاوي والفنا غايةٍلـه
في يوم ميلادي سمعت بوفاتـي
بحر الجنون اللي يخيفك مطلـه
انا على شاطيه كاتب وصاتـي
اما غرقت ويضحك البحر كلـه
والا نجيت وفاخري في نجاتـي

تابع ( 2 )

رفيق الجرح


تكفـى رفيـق الجـرح ناولنـي ادواه
انـا انقتلـت وخنجـري فـي يمينـي
يممـت شوفـي شطـر وجـه محيّـاه
يوحي لي انه خلق مـن شـان عينـي
جيت ابزعل نـاره ابـي جنـة ارضـاه
ماكنت اشـوف الفـرق بينـه وبينـي
اثر النخيل اللي علـى الـدرب تزهـاه
تاقـف شمـوخ وكنـهـا تحتريـنـي
هـذا انـا ياربـة الحسـن والـجـاه
بعـت الشكـوك وراس مالـي يقينـي
مجنون شعر انسـج خيـوط المعانـاه
من حنطة ايدينك ومـن عشـب طينـي
العمـر كلـه بيـن حرفـي ومعـنـاه
سجنـت فـي بيـت القصيـده سنينـي
هـذا انـا طفـلٍٍ تهـاوت بـه خطـاه
مرعـوب فلـي شـالـك ودثريـنـي
فنجان حظي كلمـا جيـت ابـا اقـراه
شفت المصايـب تنكتـب فـي جبينـي
الحـظ يرسـم خـط عمـري ويمحـاه
وانـا اتـعـذب والقـيـود بيديـنـي
هـذا انـا والقلـب هـذي عطـايـاه
ان مـا وصلـت لغايتـك سامحيـنـي
اضحك من اقصى الجرح وابكي من ادناه
متناقضـات الخلـق مـنـي وفيـنـي
تكفـى رفيـق الجـرح تقتلـنـي الاه
خابـت ظنونـي والقهـر محتويـنـي
ياليت ساقـي ظـل هالـدرب ماجـاه
قبـل النخيـل الباسـقـة تزدريـنـي
ياليتنـي ظلـيـت حلـمٍـت تمـنـاه
ولا حقيقـه بعـدهـا مــا تبيـنـي



لاالعد يخلص ولاحنا ارتوينا


حتى أنت ياعاشق التاريخ........ تخشاه
وانت البدر وين ماتضوي .......سرينـا
عبدالعزيـز ((الظلال))افـبيرقـه جـاه
اكتب.... و((الإعجاب)) من حقك علينـا
اكيـد جـدّك كـتـابٍ سهل...نـقـراه
لكـن مـن الصعـب نكتـب ماقرينـا
من يوم كنا ((صفوف اولى)) ..حفظنـاه
سيرة....على ذكرهـا العاطـر ربينـا
جينا نبـي نكتبـه ...صرنـا نتهجـاه
سطـور غيـر السطـور اللـي تلينـا
في كل سطـرٍ مـدى فعـل اكتشفنـاه
عقـب اكتشفنـا طمـوح العـود فينـا
رحلـة طويلـة علـى نهجـه ومبـداه
شف كـم مشينـا .. ولا بعـد ابتدينـا
ابحر شـراع القصيـد افـبحـر يمنـاه
((ميـة سنـه)) مبحريـن ولا رسينـا
حارت بنا الريح .. وينه شـط مرسـاه
بعيـد.... وفـكـل ميـنـا يحتريـنـا
شفناه في ((نجد)) وفـ((دارين)) شفناه
وعشناه فـاقصى الجنوب وحد ((سينا))
لكن عجزنا ((نسافـر)) مـع مطايـاه
من ظلمة ((الطين ))لآخـر ماضوينـا
ياطله الدرب ... من خيله و((شلفـاه))
حتـى بيـاض المصاحـف فـي يدينـا
مشـوار مـا كانـت اكفوفـه محنـاه
تشققـت لـيـن قــدرت تحتويـنـا
يابدر قصر بنـا ((المعنـى)) ومغـزاه
قول الف شاعر... وقلي وش غزينـا؟!
((عدّ البطولة)) ظمانا ما وصـف مـاه
ندلي..وندلـي.. وكنـا مــا ادليـنـا
ميـة سنـة نـارده ونــرد نظـمـاه
لا العـد يخلـص ولا حنـا ارتويـنـا


حطوه بين الممكن والمستحيل


اجذب الشوف حتى وجهك المستبـاح
وان قدرت اجذب القلب الشقي واطعنه
شفت عندك رماحٍ غير كل الرمـاح
تطرح الصدر لوكان القمـر مزبنـه
الصخب والمرايا والوجيـه المـلاح
ارسمت في عيوني لوحـةٍ مخزنـه
من تهجيت صوتك خامد العطر فـاح
عطرٍ اعشق دياره وافتـدي موطنـه
سرت كل الرجا والخوف والانشـراح
تاه فيك الزمان وضاعـت الامكنـه
اطلق ايديك لانسام الهوى والريـاح
خل جرح السنين يفـز مـن مدفنـه
في لياليـك هـذي تستبـد الجـراح
ليلة (النيل) لو قلبك خجـر تطحنـه
من سراها وقف بين الزعل والسماح
تصهر الجرح حتى ينجلـي معدنـه
كل سرٍ الى سولف لـه النيـل بـاح
والعصيه تصيـر مسالمـه مذعنـه
جيت مثلي من الظلمى تدور صبـاح
تحسب ان الهموم تشيلهـا الدندنـه
شفني اشد وانزل وين مالبـرق لاح
ساعتـي ماتراعـي دورة الازمنـه
من تردّت حظوظه لو ضحك ماستراح
تمدحه في الصباح وفي المسا تلعنه
طال هالدرب ما كل الخطـا للفـلاح
خطـوةٍ تستحيـل وخطـوةٍ ممكنـه


ذيك البدايه


ماني بمرخص يدي .. واغليك يالماس
ماعمـر ذوقـي تغيـر فيـك رايـه
غلاك من مطلعه مبني علـى سـاس
يفنى العمـر والغـلا ذيـك البدايـه
خلك غنى الذكريات وخـد الافـلاس
يتوسلك .. واحرمه من كـل غايـه
هزيت حريتي .. والعشق " نخـاس "
وجـه يبيعـه تجافـيـه المـرايـه
اسمع حكايات وجهي بيـن هالنـاس
الوان لو شفتهـا .. شفـت الهدايـه
ضاع الامل ..واعتبرت ان الحلم كاس
يقـل .. يكثـر .. مصيـره للنهايـه
بعد الف لايمكن وبعـد الـف لابـاس
كلمـه .. لـو اقولهـا تبنـي بدايـه
ماقلتها والغضـب مشـوب الانفـاس
وابليـس يقبـض تلابيـب الجنايـه
فاض الردى واعتصمت بكل نومـاس
مذكور فـاهلي وربعـي واصدقايـه
والا انا طفل كلـه قلـب واحسـاس
اغرق بدمعـه واغـرد مـن حكايـه


السراج الاعمى





لاياصبـاح الامـل لاتلبـس الظلـمـا
خذ بارق الليل نور ان خانتك شمسـك
أنا قهرت الدجـى بسراجـي الأعمـى
من شان اغني مواويل الهوى بعرسك
صوتك صداه انكسر من رقتـه وادمـا
مايوقظ الطفل من حلو الكرى همسـك
صح المدينه بدبـك خيولـك الدهمـا
واكتب على سورها للذاكـره درسـك
الذاكـره ناكـره ماتحفـظ الأسـمـا
ان ماجرحت الحدث يومك يصير امسك
قدامـك النـار والنيشـان والمرمـى
احرق شمال الأفق واحرص على نفسك
اشتقت للشمس شوق القاحلـه للمـا
مليت سـود الليـال وملهـا غرسـك
جيتك بيدي زهـور أقسمـت ماتظمـا
إلا أذا ودعت وجـه الأفـق شمسـك



آه ياهذا الطريق

ياقلم في سيرة اهل الشعر مـن قبلـي وبعـدي
مايسري شاعر فـظلما الـورق هـم ٍ لحالـه
ليتني يوم اخترعت القوس جيـت بريـم نجـدي
كنت فوق السـرج ماداستنـي اقـدام البطالـه
لاسلام .. على الطريق اللي مشيته جهل وحدي
بعد ماعقلوا بني جهلـي وكـل مسـك جالـه
رحت ماعرف مبتداه .. ولاآخره وينـه يـودي
اعرف اني من جنوب التيه واحلامـي شمالـه
مامعي غيـر الله الواحـد .. ومسبـاح بيـدي
مرة اتهيبـل عليـه ومرتيـن اسمـع هبالـه
والطريق من اوله عاصي .. وانا غاوي تحـدي
من جرح شي ٍ من ظلالي ذبحت اجمـل ظلالـه
والهبوب بطبعهـا يـوم معـي وايـام ضـدي
والطبيعة مثل " شيخ البـر " تنقصهـا العدالـه
" الصواع " اللي يكيل فيه ماجـا نصـف مـدي
قلت له ياشيخ ! قال - اعطوه - مكيالٍ بدالـه
رحت مبسوط بعطايا الشيـخ مافـالتيـه قـدي
جايعٍ دانت له " الحنطه " وصارت فـي رحالـه
يوم ناصفت الطريـق الا الخطـى فيهـا تـردي
واعرف ان اللي طعامه بر مايشكـي الهزالـه
قمت اسال التايهين اللي وقف .. واللـي يعـدي
وآخر المعنى طلع مافـالرحال الا " نخالـه " !!
آه ياهـذا الطريـق اتعبتنـي وابديـت ســدي
مابقى غير القصيـد احزمـه وانكّـس عقالـه
يايمين الحبـل لاترخيـن فـوق الشـد شـدي
ماربح في ذا الزمن متساهـلٍ يرخـي حبالـه
يالطريق الدلو فـيدينـي يبـس والعِـد عِـدي
من عرفته ماورد عذبه شفـوق وخـاب فالـه
جيت لك - مهدي سعيد - ولارجعت سعيد مهدي
هذا انا من شارع الجوعا .. الى خان الظلالـه


وصلت من التعب حدي


لاتندهش من جنوني من عبـث يـدي
الطفـل فينـي معيـي يافهـد يكبـر
معكم وكني على شط البحـر وحـدي
ابني بيوتٍ كبر عمري وهـي تصغـر
وابني شراع ٍ قليـل الحيـل مايمـدي
مثلي شراع الـورق ينـوي ولايبحـر
يافهـد ودي تعـود المرحـلـة ودي
مايكفـي انـي الـى خاويتـك اتذكـر
عشت بزمان ماهو باخضـر ولاوردي
احزانـه احـزان وافراحـه ولاتذكـر
مـاودي اعلمـك لان الشقـا يعـدي
خلك على حلمك اللي موعـدك يثمـر
انا تعبت ووصلت مـن التعـب حـدي
هذي جراحي على سيف الورق تقطـر
عبث بغيت اختلق من جمرتـي بـردي
وانا ادري ان الغيوم الحمـر ماتمطـر
في موطن الحلم ضعت وخان بي وعدي
هزايمي تنقـص ايامـي وهـي تكثـر
استوطنوا يافهـد نـاس لفـوا بعـدي
وانا الى الحين من مهجر الى مهجـر
ماني موصيك كيف تكون .. ماعنـدي
التجربة كلهـا فـي الحبـر والدفتـر


ذل المطر


قالت تمن .. وقلت ضحكه من القلـب
قالت حزين ؟ وقلت ماعرف شعوري؟
قالت يصير الشاعر المرهـف العـذب
يجهل شعوره؟ قلت ماهـو ضـروري
فهم المشاعر غلب والبوح بـه غلـب
تكفيـن خلـي لـي بقايـا غـروري
فينـي جـراح ٍ مزمنـه مالهـا طـب
عايشتهـا تمثـيـل واتقـنـت دوري
عودت من حولي على الخاطر الرحـب
جبر الخواطر صـار معنـى حضـوري
هذا اعتزى باسمه وهذا " على جنـب "
ارسـم علـى كراسهـا ورد جـوري
اغمض الين احلامهم تدخـل العشـب
واخرج من ابواب السكوت الجهـوري
عودتهم .. واعتدت سهلٍ غلب صعـب
صار الحلم ضحكه .. تجبّر كسـوري!!
من يوم حزني والفـرح غايـة الحـب
اللـي توسلتـه لمنـفـى ســروري
دوني على حدود الفرح رمـل ماحـب
الا هبـوب قوتهـا مــن عـثـوري
امطرت باللي في زمن دين .. من عرب
ذل المطر .. والرمل .. واشكر جذوري
قالت الى هالحد ؟! قلت الوفـا : كلـب
ضحكة ودارت قلـت : ماقلـت دوري
كل اربعا موعد علـى ساحـل الذنـب
ان طـاب وقتـك شاركينـي فجـوري



التباس


يامترف الكاس صبه عل يروى اليبـاس
جيتك من ارضٍ مطرها مايبـل القصـب
ياأجمل الغي زدني كـل هالعمـر كـاس
إن ماشربته على كيفي شربتـه غصـب
كاسٍ على اول سواليفه يحـوم النعـاس
وكاس ٍ من اول سواليفـه يهـج التعـب
الليله الكـاس بعيونـك نهـر مايقـاس
ان ماروى يابس عروقي نذرتـه حطـب
ضيعت الاعوام ادور عن بديـل النحـاس
والليله اقدر أقول انـي مسكـت الذهـب
مااظن بعدك عرا ولااظـن قبلـك لبـاس
انت اول البرد وانت آخـر صعـود اللهب
باخذ جبينك وطن .. ورموشك السود ناس
أجمل بلادٍ تقيـم العـدل واجمـل شعـب
بابدا معك طفل يتعلم وبانسـى المـراس
علمني اشلون اباتقـدم وكيـف انسحـب
ماتت شعاراتي الأولى ومـات الحمـاس
الى متى اعلم السـدرة تساقـط رطـب
ماللسراب اصل والما عيبـه الانعكـاس
في النور والحور وجباه الحسب والنسـب
ابواب ماتنغلق .. جدران من غير سـاس
جنيت وانا استمع للطين واقـرا الخشـب
وحتى النقوش القديمة في بعضها اقتباس
احتـاج ميتيـن فـم لصدقهـا والكـذب
ياأجمل الغي في نهج الحياه " التبـاس "
عيا يبين معـي واحرقـت كـل الكتـب



يقين الشك

في سؤالي غبا .. لو قلـت مـن تشبهيـن؟
عيـب يطـري علـى بالـي وعيـب اكتبـه
لو يقولون : " يخلـق مـالشبـه اربعيـن "
أقدر اقول : وجهـك .. ماخلـق لـه شبـه
صعب هذا " البيـاض " انـه يجـي مرتيـن
فـي وجـوه بـزيـف الـلـون متقلـبـه
قبلـك الشعـر انـا ويـاه : سيـف ويديـن
ماغلبنـي .. ولافـكـرت كـيـف اغلـبـه
وبعدك اعلنت شكي .. صـار للشعـر عيـن
يعترف فـي رداة اصلـه .. وضعـف نسبـه
قيدينـي .. وخليـنـي بضعـفـي حـزيـن
لين يفصح قصيـدي واعـرف مـن انجبـه
قيـدك اول تمـرد .. فـي نضـال السجيـن
لاتفكيـن قـيـدي .. يمـكـن استوعـبـه
باكتبك في السهر .. والصبح .. والياسميـن
في مرار القصيـد .. وفـاعذبـه .. واكذبـه
بـاكتب .. وبـاشطب الطاروق : غث وسمين
بيت مـا" حلله " وجهـك " حـرام " اشطبـه
وجهك " استاذ " .. واطفال الشعـر حالميـن
يدهـشـون المعـلـم .. مــره وينتـبـه
في عيونك شباب الحـرف .. يرجـع جنيـن
مـن جديـد احـلـم اربـيـه .. واهـذبـه
لازم اغلـط واحـاول .. واغلـط وتعذريـن
فضـة الشعـر حولـي .. والبعيـد ذهـبـه
أجمل الشعـر .. بيـت ٍ كثـر ماقلـت زيـن
ارجع انقـض يقينـي فيـه .. واشـك بـه
علمينـي أشــك .. ولاأصــل لليقـيـن
لو وصلـت ليقينـي .. وش بعـد أكتبـه ؟!!


عناد النزف




ان كان لك نيـه تودعنـي بـجـرح
تكفـى بجـرح ٍ مايشافيـه غـيـرك
مابغى الجروح اللي تساوم على الصلح
أبغى " عناد النـزف " بعـدك يثيـرك
قوم رياحك حـرض الرمـل والملـح
تملى العروق المبطيـه مـن غديـرك
مانـي مبـدل فيَّـة النخـل بالطلـح
ان مـال ظلـك مالـي الا هجـيـرك
قلبي بـلادك لاغـزو بعـد .. لافتـح
ماخلق بعـد اللـي يسهـل عسيـرك
جمعت منك اضـداد ماتقبـل الطـرح
ماشكـي قسـاك الا لناعـم حريـرك
وفاك فيما كـان مـدحٍ علـى مـدح
لو كل شرك مايجـي بعـض خيـرك
لي عام .. لي عامين لاحـزن لافـرح
مدري وش اللي بين غصني وطيـرك
كان الوداع - اجرح - ولاتطلب الصفح
والله عطاك ايليـن يصحـى ضميـرك


وافيه

مرحبا واحد يناير .. مرحبـا والشـوق دوبـه
يرسم العين بكحيل النون والساهـي سماهـر
وافيه .. ماراح من هاك الرفيـق الا عيوبـه
طيبـه الزايـد وتلويحـه لبـراق المظـاهـر
صوتك الشاعر ثواب النور في ظلمـا العقوبـه
لاستكان الظن عن خدر الحرير اقبـل مجاهـر
بالمعاصي كلها من فـزة الشيـخ لـهبوبـه
للصباح اللي غفت له سوسنه فـعيون ساهـر
وافيه .. للعذب طعم ولون واغرق في الكذوبه
صرت اجيد الصدق باكثر من لغة , والتيه ماهر
توه اللي كـان مايشبـه ضحـاه الا شبوبـه
بالدجى لاقيل واصبحاه .. هـذا الليـل قاهـر
ماعلينا .. كل من خاف العـرا يغنيـه ثوبـه
الهوى مكفول من معطيه .. والمحراب طاهـر
ان حكيتي زمزم اطهر مايراق مـن العذوبـه
وان سكتي صوتك اغلى مايصان من الجواهـر


كل ليله


كل ليله

والخيال اللي سواليفه مزون..

يعل سيله

كل ليله والصباح أرباح..

والفلاح لوحه بين (حي على الفلاح)..

و(هيله هيله)

اقصر احلامي طويلة باع..

بين صواع كيال الذره..

وشراع صياد الجمان،

المعذره.. عن ما يشاع.

المعذره خبز التخاطر حدس..

واسف للجياع..

تجريبي الأول قناع..

تجريبي الثاني ضياع بـ هيل هيله

كل ليله والقصار قصار

وتمون الطويله

تسدل السلوى على البلوى ستار

تخفض الحكمه إلى اسفل شاعر..

يمجد شعار

للصعود المنحدر من طير ريشه

مستعار..

وينتمى له

كل ليله تورق أشجار النهار..

ويعشق الوادي نخيله

وكل صبح وهالبراري ملح..

ما صارت خميله

* *

كل ليله والمغني ضد صوته

والسؤال الحي فـ عروفه جواب..

لشكل موته

فـ الدروب اللي تشكك في عصاه..

وفي نباه.. وفي سكوته

فـ الهبوب اللي تسول للعطش

يعلن مماته

يوم ''عيداليم'' تذكير بحياته

''اطلس القيعان'' ترفاه الشقوق..

الساطعه مثل العقوق

القاطعه مثل الشماته

والوفاق المعدني..

يبرق من اقصى قاصيه في موطني..

لادنى جهاته

- مواطني عزه بذاته -

موطني ثامن سما..

والشمس عنده جاريه..

والليل ليله

* *

كل نجم فيه لوام المغني..

وين تهرب؟

كل ما بعد السياج احراج

والملح المهرب

ما يزكي عاشق دمه وريث لدم ''يعرب''

وين تهرب ؟

والسواحل في دمك ''نجد''..

وبيارق مجد..

وانساب وتقرب

وين تهرب ؟

وانت ''للسرحان'' بذراعك وريد

لنخل ''يثرب''

وبشرايينك بيادر قمح

وجنوب وقبيله

ــــــــــــــــــــــــــــــــــ

وحي الأرق



متى اكتشفت ان العمر ..
" حفنة ورق "؟!
مدري متى ..
لكني اتذكر تعذيب الشفق
وقبلي قطيع من الهجوس؟؟
وخلفي هزيع من "الأرق "!
**
واتذكر فـ صبح الهزيع..
ان الفصول تبدلت
حتى الربيع..
اقدم جميل فـ دفتري واول
عشق
يبست زهوره في الخيال ..
" إلا السؤال "
امتد فـ كتابي ..
وفـ احبابي ..يفتش عن شمال
المفترق
**
وكان الطريق
يضيق مثل المدرسه
مثل " الزوايا " اللي تحاصرني
فـ ( علبة هندسه )
وصار " الأصيل "..
حكايتي .. ودربي الجميل ..
الى الهديل الي اللي بدمّي
مغرسه
اصحى .. اشيله تهمةٍ بالمسّ
أو بالوسوسة
وانام واصحى اتلمسه ..
لاينسرق
**
وبعد الدروب ؟..
درب لآخر هالعمر
وايام تجمع هالورق ..
في دفتري ..
من يشتري؟!
من يشتري دفتر شعر؟!
ويبيعني " ليلة سلام "..
ابغى انام ..
ابغى انتصر ليلة على ( حرب الكلام )
ابغى انتصر
من يشتري وحي الأرق !


ــــــــــــــــــــــــــــــــــ

مشهد طريف



ياعاصف الشعر العنيف
هون فديتك ..
لامهار ولاعسيف
ثلثين من ذيك الخيول
" تبغلت "
والثلث من سرجانها ملت ..
وقيل تحولت
في ملحمة فرسانها مشهد
طريف !
**
اركد.. ترى ماهالدفاتر
واعيه
ولاالقلم ..
عنده ضمير الداعيه
اثنينهم مزمار..
ماوسوس لخصر الراعيه
ولاريح الراعي
من النفخ الكليف
**اثنينهم من ألف ظلمى ونجم
مصباحٍ ردي
يخفي عن عيوني يد الرامي
ويكشف له يدي
كسري فدا ..وذبحي فدي
ليلٍ مخيف
من يوم صار معزبي ...
مايتسع بي خاطر الا ضاق بي ..
حتى القمر
شيح النجوم وعم عشاق
السهر
ضحكه ثلاث من الشهر
وباقي ثلاثينه كدر..
ماله وليف
ياما سفحت لفزعته
قاف " روى "
حتى صعد من وتر مسباحي
خشوع ومستوى
يافارس الظلمى القوي
محتاجك الليله خوي
من هالجهه سبع الحدود ..
ومن هالجهه ذيب ايعوي
وياما ظهرت الصبح من كم
الكفيف
ماشوف من وجه النهار
الا الرصيف
وجروح من دم العرب
وتابوت من يم النهار
والثالث اللي مابتعدت الا اقترب
" هم الرغيف "

ــــــــــــــــــــــــــــــــــ

تجلي



يالشراع اللي وقوفك عزم
قل لي
واقفٍ للريح
والا تايب واقف تصلي؟!
واهنيك فيك حيل تقوم ..
حيل تعوم..
حيل تثور ..
في عصر التولي
واهنيك عندك المالح طهور ..
وقلبتك لحظة تجلي

ــــــــــــــــــــــــــــــــــ

بعد وحده

بعد وحده
كل غصن س من غصون العطر
يتنفس لوحده
بعد وحده
ينصرف وجه المدينة لاشوارع ..
لـ ابنيه
يستحيل الليل شباكين
والباب امنيه
ممكنه .. واعرف يقيني نرجسي ..
حتى العبق
حتى الارع والغسق
نرجسي حتى الندى ..
حتى اغنيه
كثر ماغنيت .. ماغنيتها
وتظل وحده
بعضها كل العطور ..
وكلها بعض الموده
وحدها اللي مقبله .. والليل فات
وحدها اللي مدبره .. واقول جات
وحدها الاربع جهات
العادلة والمستبده
وحدها والعطر ماعنه خوات
الا اخت وحده
" ليلكه " قبل الثمان..
و " نرجسه " من بعد وحده

ــــــــــــــــــــــــــــــــــ

وجه الشبه



في شرود المنتبه
فـ انتباه الحالم بوجه الشبه
لو حلم شاعر بموته ..
يعني نص بيكتبه
لو حلم غصن بحياته ..
بعد ماخط الجفاف اسطر مماته ..
يعني فاس بيحطبه
لو حلم اسم بوجوده ..
بين الاسما اللي يدربها
وتقوده ..
يعني جا من يشطبه !!