الليل والشعر والذكرى


مشاعري عاجزٍ شعـري يترجمهـا
احساسي اكبر من الكلمه ومعناهـا
لو للشقاء ارقام يمدينـي محطمهـا
ولو علتي بالرواسي ذابت أقساهـا
اهل دمعي خفـا والونـه أكتمهـا
خايف على الروح من كشفة خفاياها
لعيون من سرها تعذيـب مغرمهـا
أصبر على علتي لو يصعب دواهـا
ولو قال قلبي قست قلت انت ظالمها
راجع ليالي غرامك واذكـر احلاهـا
الصورة اللي خيوط الليل ترسمهـا
اعيـد لعيونـي المغـراه ذكراهـا
ذكرى مع الوقت ماتمحى معالمهـا
بيـن الليالـي بظلماهـا وقمراهـا


صـــــــبا نجد


ياصبا نجد جـددت الجـروح القديمـه
يوم ذعذع هواك وخالـي البـال نايـم
ياصبا نجد ليت أهل الحسد والنميمـه
منك تستوحي اللين وصفاء النفس دايم
لأجل من يشتكي لوعات فرقـا نديمـه
مايصيرون ضده بيـن واشـي ولايـم
ياصبا نجد وين اللي وصوفه عديمـه
نار فرقاه حطت فـي فـؤادي علايـم
ياصبا نجد قله كـان ظيمـي يظيمـه
لايطـاوع بحبـي ناقليـن النمـايـم
مثل ماقالوا (العاقل ضميره خصيمـه)
والله إني من أجله عن هوى الغير شايم
ياصبا نجد لولا أهل العقول السقيمـه
يصنعون السوالف بيـن زور وظلايـم
كان والله لاجيـه بصـورةٍ مستديمـه
المسافـات ماتفـرق قلـوب تـلايـم


وين الحنان

يوم الوفا له في مشاعـرك عينـه
ونا معـك وافـي ورى ماهقيتـي
إنسقت مع شوق الخفوق وحنينـه
ماقلت كم خذتـي ولاكـم عطيتـي
أعطيك نون العيـن لـو تطلبينـه
واخلق لك الاعذار مهمـا قسيتـي
ويوم اعترفت أنك لقلبـي وزينـه
طاح القنـاع الـي وراه أختفيتـي
وين الحنان اللـي معـي تدعينـه
وين الوفا اللي في ثيابـه بديتـي
صرتي لدهري في عذابـي عوينـه
هدمتـي اللـي بالامانـي بنيتـي
تأكـدي كـل البشـر تخدعيـنـه
إلا خفـوقٍ مـن حنانـه رويتـي
ماعاد أنا الطفـل الـذي تخبرينـه
يزعل وترضينـه متـى مابغيتـي
شوقي غدى كتلـة رمـادٍ بطينـه
وهو امس نار من وهجها دفيتـي
وش عقب موت الشوق لك ترتجينه
ياللي بـراىٍ مـا نفعـك اقتديتـي
غلاك في قلبـي هدمتـي حصينـه
وعليـه بأقـدام التعالـي وطيتـي
لادمـع هـل ولا مشاعـر حزينـه
سـراب بينتـي سـراب انتهيتـي


لو يسألونك

وش تقدرين اليوم عنـي تقوليـن
لو يسألونك غيـض والا شماتـه
مدري؟ ولكن وضحـي لا تخفيـن
وفـاك للماضـي يجسـد حلاتـه
رغم الفراق الي مضى دونه سنين
قولي لهم كنـت الحيـاه بحياتـه
أعميت قلبه عن جميـع المزاييـن
وأنكر معي عذري الاحساس ذاتـه
أضحك وهو يبكي من الوجد والبين
وأبكي معه تمثيل وأشكـي شكاتـه
لين أدمن الحيره وشكوى المحبين
وأصبح غرامه بي..من أبرزسماته
أربع سنين مولع السمـع والعيـن
شوفى هنا دنياه...واسمي غناتـه
والخامسه صارأختـلال الموازيـن
فقدت ما كنت أعشقه من صفاتـه
صار السكون اللي عهدته براكيـن
وحلـت عبراتـه محـل عبراتـه
وإقفي هنا بالشـرح لا تستمريـن
خيالـك المبهـوت لمـي شتاتـه


وهم الاحلام


النـور للمسروربيـن شعـاعـه
وأنا نهاري مثل ليلي بـلا نـور
ضيعت وقتي ماشعرت بضياعـه
يوم الخفوق بوهم الاحلام مغمور
ماقلـت للعـذال سمعـاً وطاعـه
مخدوع في ضحكة زماني ومغرور
يومه يقول اغنم من الوقت ساعه
لذاتها تحيا بهـا روحـك دهـور
وساير زمانك في مسارك وراعه
ترى الهنا عقبه يجي للعنـا دور
أنقد على هرجه واحرم سماعـه
وأصنفه في مرتبة شاهد الـزور
واليوم يوم الوقت بيـن خداعـه
وبدورة أفلاكه كشف كل مستـور
مالي بتغيير الضروف استطاعـه
حتى ولو حبل الرجا صار مبتور
يستاهل القلب الغشيـم التياعـه
جزاه يومنه رفض صادق الشور


تعالــــــــــــــي

صحيح انك زمان فـات غالـي
قبـل تكشفـك دورات الليالـي
حسبتك شمعتة تضوي طريقـي
وجعلت رضاك ربح وراس مالي
تركت اللي يقاسمنـي همومـي
وتابعت السراب اللـي زهالـي
سـرابٍ قادنـي يـم المهالـك
غشى عيني وخيم فـي خيالـي
وعقب بان الخيال من الحقيقـه
تندمت ورجعت لمـن صفالـي
الا ياروحـي اللـي فارقتـنـي
عقب زال الوهم عنـي تعالـي
تعالي حسسيني فـي وجـودي
معك معنى الوجود اول وتالـي
أنا لك لو خدعني زيف وقتـي
الأول بالغـلا مـالـه بـدالـي
أنا لو غلطتـي كانـت كبيـره
يكفرها العـذاب اللـي جرالـي
تعالـي جـددي عهـد المـوده
محت يمناي ماخطـت شمالـي
تعالي عوضي حرمـان قلبـي
مكانك ظل طول الوقـت خالـي
تعالي لو بقـى بالعمـر لحظـة
تساوي من حياتي ما مضى لي
أعزف بقربك الحـان السعـاده
وأقول لعاذلـي مالـك ومالـي
خذ اللوعات من دنياي وارحـل
انا عضن الهنا مـال ودنالـي


همســــــات قلب


غابت نجوم الليـل والنفـس حايـره
والقلـب ممـا بــه كبارٍجهـايـره
يبيع في سـوق الروابـع ويشتـري
لاشـك ربحـه مايغطـي خسـايـره
يذكر من الماضـي طراتـه ولوعتـه
فـي حاضـر ماحصـل الا عزايـره
الهايم الولهان مثلـي إلـي اشتكـى
قسـوة زمانـه لاتقولـون سـايـره
إلي قام ياس الحب يطغي على الرجـا
قدرة وجيـع القلـب هلـت عبايـره
والحـب لذاتـه ولـو طـال وقتهـا
مثل الطيوف اللـي بالاحـلام زايـره
إلي استيقظ الولهـان زلـت طراتهـا
لكن حشـاه تزيـد لاهـب سعايـره
أنا الـذي عقـب المسـرات والهنـا
علي قاسـي الوقـت دارت دوايـره
في غبة الحرمـان غرقـت مراكبـي
والبحر هايـج والعواصيـف جايـره
مرات الـوم الحـظ واقـول خاننـي
ومرات أقول الوقت هـذي سوايـره
الضيق من ميل الـي ميـل ينفـرج
كالصبح تالي الليـل تظهـر بشايـره
واحاول اخفي مابروحي مـن الولـع
واهدي اشواق مـن الوجـد ثايـره
لكن جريح القلب لو حـاول العـزي
لازم شرود الذهن يفضـح سرايـره
يلومني من همـه القـوت والكـرى
وعما سواهـن معمـي الله بصايـره
ماسمع همساتٍ مـن القلـب تندفـع
للقلـب وتعيـد الربيـع لضمـايـره
إلي قام يسترجـع صداهـا بوحدتـه
تصـور الافـلاك لرضـاه دايــره
ولا عاش لحظات اللقاء...نشوة الفرح
في غيبـة الحاسـد وغيبـة نطايـر
في موقف ٍنظـرات الاحبـاب بينهـم
باسرارهم من غير منطـوق سايـره
لحضـات حلـوه مايكـدر حلاتـهـا
إلا الفـراق الـي فجتهـم نـذايـره
وصار اللقاء ذكرى والاحزان منتهـى
لقلوب ذابت وجـد ونفـوس حايـره


غيمة حنان


بين بحر العذاب..وبين بر الامـان
رحلةٍ في حياتي طـال مشوارهـا
ليل الاحلام..مناني بصفو الزمـان
وقبل يوفي محته الشمس بأنوارها
مابقى للعزى في وسط قلبي مكـان
ليت الايـام جنتهـا كفـت نارهـا
ضاق رحب المكان وقدر الايام هان
عند نفسٍ شكت من قسوة أقدارهـا
ظللتني ثمان سنين غيمـة حنـان
ابتدت ونتهت...ماهلـت امطارهـا
ليت عمري وقف عند السنين الثمان
ويش ابي عقب لذتهـا بتذكارهـا