على الله يازمن بشكي جروحي والليالي طـوال
عسى راعي العنا ينسى عناه وينشرح صـدره
على الله يازمن بشكي همومي و الهموم جبـال
تعدّت عاصمة حزنـي حـدود العالـم بأسـره
خساره يالسنين اللـي كتبتـي سيـرة الرحـال
فرحت أمس وحزنت اليوم بس الخوف من بكره
لساني كم شكى صمته والى منّه حكى ماقـال
طغى طبع السكوت بسيرة المحروم من صغره
سقى الله يوم كنت اضحك وبالي مستريح البال
ضحوكٍ ماعرفت الحزن وش معناه وش قـدره
وكبرت وكبرت أحلامي وصارت قصة الترحـال
أماني في مهب الريح وحلـمٍ ماكتمـل بـدره
بعذر اللي مع أيامه جلس يبكي على الاطـلال
تذكر ماضي أفراحـه اليـن خنقتـه العبـره
عزيزه يالعيون اللي حضنتي دمعـة الرجّـال
حبستي دمعته بين المحاجر يوم ضاع امـره
عزيزه يالحروف اللي سكتي والكـلام يقـال
حكيتي.. ماشكيتي الهمّ وهمّ القلب ياكبـره
عزيزه ياليدين اللي ثنيتك باصعـب الاحـوال
اكفّك ساعة الحاجـه وامـدّك ساعـة القـدره
وعزيز النفس لو يصبر على صبر الليالي نال
ابصبر والرجل يصبر ومقياس الرجـل صبـره
انا منهو حمل همّه على راسه تقـول عقـال
مجاديف الزمن دارت عليه ونَسّـف الغتـره
وانا منهو فقد صوته وبعض الصوت به مـازال
دعيـت الله يفرّجهـا علـيّ وبحَّـت النبـره
أشيل الحمل عن غيري وحملي صار ما ينشال
كما الشيخ الهزيل اللي مشيبه منقضٍ ظهـره
جروحي مزنةٍ منها هطل فيض الشعر همّـال
سقت جدب العروق اللي تبلـل ريقهـا قطـره
وعن حر الزمن صارت حروفي للجروح ظلال
تذرّت عن هبوب الياس حلمٍ قد بنـى قصـره
عساها للمطر روحٍ بها وادي الظمـا ماسـال
عروق سنينها جفّت وورّاها الزمـن غـدره
عساها للمطـر روحٍ قضـى مرباعهـا ماطـال
كساها ثوبها الاصفر .. وكانت تلبس الخضره
على الله ينجلي وقتٍ قضيته همٍ و غربـال
ويشعّ النور في قلبٍ غشى ليل الظَلَـم فجـره
على الله والولي الله وبامر الله يزين الحـال
ويضحك للزمن قلبٍ مع همومه قضى عمـره
منقول
تحياتي للجميع ،،،،
أبو فهد
على الله 
العرض العادي
