ما يضحك الجاهل من كثر


ما يضحك الجاهل إلا من كثر جهله
لا زاد همك ترى ما للحكي داعي
غنى صبي القصيد.. وجاوبه كهله
والوقت يعصى شهر.. وسنين ينطاعي
لقيت قصر المديح.. ولا لقيت أهله
من جاك ينشد ترى ماهو بفزاعي
لو قال يمدي؟.. ترى ما للقدر مهله
لا الحظ يشرى.. ولا الأعمار تنباعي
ما هو بأنا اللي يعود حين ينده له
أصعب من قفياتي لا أقفيت مرجاعي
يحق له.. يفرق اللحظه عن الوهله
دايم.. ولكن خطا لو يمدح أوضاعي
ويحق له ..لو يعاتبني على مهله
دايم ولكن خطا لو يلوي ذراعي
يا صاحبي والله ان المسأله سهله:
كل واحد شيخ .. صعب تحصل الراعي
ما يبكي العاقل إلا من قصر جهله
لا زاد همك ترى ما للحكي داعي


أنا يا بدر مع طاري

أنا يا بدر مع طاري الصوت لين أمسيت
و أنا لا بعد هالصوت جاني ولا قبله
سرى بالخفوق و جيت أجاريه مير ازريت
سرى بي شمال و لهجته عودت قبله
و انا والله أني خابره بس ما صديت
قبل لاعب بي يابدر لعبة السبله
من العام لا مل انتظاري و لا مليت
سحاب الكلام ولا انقطع فالرجا وبله
من العام لا من مد وضل الغلا مديت
و أنا الوصل وصلي .. بس حبل الغلا حبله
أقول أنت وينك غايب / قال : أحسبك ميت
دبلني .. و أنا كبدي من العام مندبله
و أنا تحسبني تبت و إلا قنعت و جيت
هبلني مثل ناس لهالحين منهبله
تتالى على دربه رجال النعم و الصيت
( ويبي هلال يفرق صاحي الوقت من خبله )
و أنا يابدر مع طاري الصوت لين أمسيت
أبد .. لا بعد هالصوت جاني و لا قبله


بعذر السحاب


بعذر السحاب اللي ترزم ولا هـل
علي دروبٍ ضايـعٍ مـن رجاهـا

مابقـي الا شجـرة مالهـا ظـل
لـو الجـراد يمرهـا مارعـاهـا

الصاحب اللـي لا تعّـذر ولا مـل
وش بعدها وش عقبها وش وراها

كم له وهو يخطي وانا اقول مـازل
من يفقد بيـوت الحيـا ماعطاهـا

عذبتني ياراعي الطـرف الاكحـل
ليت الظنون جروح والقى دواهـا

ليتك عدو وارتاح من شرهة الخل
ولاتلحق النفـس الوفيـه وفاهـا

ماهو شجاع اللـي يشوفـك ولاذل
من خاف من عين المحبه حماهـا

ماقول وش يفرق عيونك على الكل
الكل في عيونـك ولاحـدٍ ملاهـا


العمـر جمـره

العمـر جمـره والمشيـب الرمـاده
لاضاق صدرك مرضي الناس يرضيك

لازاد عمـري زاد حـبـك زيــاده
والا أنت لامن زاد زاد الحـلا فيـك

والله مـدري بـس هـذي شهـاده
كن العمـر يكبـر جمالـه ويعطيـك

صارت سنين العمـر مثـل القـلاده
تاخذ من عيون القصايـد وتهديـك

هـي ذكرياتـك باقـيـه للسـعـاده
والا السعـاده ذكرياتـك وماضيـك

ماهوب عاشق مـن تحقـق مـراده
لا فكـه الله مـن جفـاك وتغلـيـك

يمكن فرح بـك حـظ تقليـد عـاده
لكـن غـلا والله مهـو بمغلـيـك

يامن بلاد الحـزن صـارت بـلاده
ترى فرح غيـرك يضـرك ويبكيـك

لو ينفـع العاشـق كثيـر اجتهـاده
ماعاش مع هذي وهو ميـت بذيـك


ياعاشق الصمت

ياعاشق الصمت بيبان الحكي فضه
أدخل بها يمكن الاحـزان تنسانـي

مض الزمن بالحكي والسالفه مضه
ما باقي الا انت..والا..مت وحداني

مابيك تذخر تعب كل التعب قضـه
مرتاح لا صرت تأمرني وتنهانـي

لك وردتين على صدر الترف غضه
لا مال غضك تهاوت ليـن تلقانـي

ليل جمعته تحت تاج الذهب قضـه
من هامة النور.. والقى ليلي الثاني

حتى تجيك الجروح الزرق منقضه
من خاطري لين ينطق حبك لساني

لو تشعل الجمر ماني خايف عضـه
اكتب بلونه مواعيـدي وعنوانـي

ما شفت غيرك عشان اقول يا حظه
هنيت نفسي معك من كل وجدانـي


دمعتيـن جــداد

(قديم السحاب) و(بارق الغيث) و(الرعـاد)
تخيلـه عيونـي (تسعـة أشهـر) وملنّـه
و (قف) و(أستدار) و(شاور الحال) بالمعواد
نصتـه الهبـوب بطـاري المـاء وردنّـه
على طاري الغيبه وعذر(ن) رجع مـا فـاد
وشـ.. علوم جرح(ن) سود الأيام زادنّه ؟
على غير عاده جبت لك(( دمعتين جـداد))
تبيهـن يوفـن العـذر مـنـك وأخطـنّـه
غريبات ممسـن حالهـن والمبيـت بـلاد
رجنّ (يقطعن المـاد) و(زداد) و(أمسنّـه)
عرضهن جميلاً مـا يبـي فالخطـا نشـاد
عذهـن بصـدق وحاولـن فيـه و أزرنّـه
و أنـا كـان ودي دمعتينـن بـلا ميـعـاد
ليـا تلهـن طــاري غــلا مايـردنّـه
يجنّ بكرامه مـن حسـب للوفـاء ميـلاد
و يفيضـن ود بغيـبـت الـلـي يـودنّـه
((قديم السحاب بماضي الحظ جاء منقـاد))
((رجنّه عيوني)) و((أستخـارن و خلنّـه))


لا تاخذينـي بالحكـي

لا تاخذينـي بالحكـي هـدي شـوي
ما هـو بكيفـي فيـه شـي بقولـه
يا منتهى اللحضـات وبدايـة الفـي
رضاك وحـده منهـو اللـي ينولـه
كن الضنون خيول وارسانهـا يـدي
في غيبتك عـن كـل شـي جفولـه
وش ينقصك لو صرتي الشمس والفي
ما ينقصـك لكـن طبعـك عجولـه
تجملـي فـي خافقـي دامنـي حـي
لا مـات مالـك بالمحبـه بطـولـه
تدرين حتى القلب ما عاد هـو فـي
عهدي بقلبي يـوم ضحـك الطفولـه
تمتعـي بالجـرح والنـار والـكـي
تمتعـي بالحـال عرضـه وطـولـه
وتعذري قولي خطأ قولـي اي شـي
قولي زعلتـي قولـي انـك خجولـه
لي كل شي الا الردى مـا هـو بلـي
يغنينـي الله عـن رضـاه وقبولـه
وتطمني لو قالو النـاس مـن هـي
من يعرف اسمك ما يتجـرى يقولـه


نهايات الغلا

نهايات الغلا ماهي بعيدة
تزيد الجرح و إلا ما تزيده
فراقك يا حبيبي كم يساوي
من أيام المواعيد الجديده ؟
أنا طالبك خذها من حياتي
ثمن فرقاك من نفسٍ زهيده
من اول بيت والله ما خذلتك
إلى آخر بيت في عمر القصيده
أنا ما عاد يغريني حضوري
على شان المجلة و الجريده
من اول كنت احسب اني الحالي
وحيد و نظرتي دايم وحيده
و اثرني طول عمري كنت حاضر
بقلبي و اطرد قلوبٍ بليده
و صرت بعين نفسي شخص ثاني
غريب يحط تفكيره رصيده
و هو ما هوب ذنبه يوم يضحك
سعيد و يحسب العالم سعيده
أقول احيان يمكن ما فهمني
و أقول احيان هو نفسه عنيده
أحسب ان المحبة فيه تكفي
و اثر كل المحبة ما تفيده
عطيته كل شيٍ كنت أحبه
و عطاني كل شيٍ مايريده
عساي انساه كان انني ظلمته
لا راح العمر من يقدر يعيده