ملاحظات

لاحظ معي ما يلي:
1- وجه الخليج
2- الضغوط
3- بعض الخرايط على ما يشبه الطاوله
4- الماء بوارج
سفاين
طايرات وشروط
5- ( كذا لبس لونه الخاكي... كذا حاوله )
6- الرمل دشم
ومخابي
وآليات وخطوط
7- تظهر على الماء ( حـxمامة ) فــ ... آخر محاوله
8- تبسط جفا... فك
9- تصيح:
10- الماء نقيض السقوط
يا موجة الماء خذي زفراتي مناوله
ما اشد من ذا الجفاف الا ذراع اخطبوط
بيني وبينه حروب الساحل مداوله
أنا اقرب الموج للصحراء ورمل الشطوط
ما عندي الا بياض اسلافي ازاوله
11- لا حظ هنا... زاد في كلمة " بياض " الهبوط
حتى اعتلى الراس عتمة ظل متطاوله
12-
13-
14-
15-
16- لا حظ معي..
صار حق المفردات مغموط
ما ظل غير الفراغ – اعلاه – والطاوله


عنـــــك

عنك ابا احكي كلما مديت للهاجـس قلـم
كلما فاض الشفق بالورد واحمر النقـاش

عنك ابا احكي كلما للقافيـة قلتـي نعـم
وانجب اسمك من زناد الذاكرة زخة فراش

يا ضحى اللي في خلايا الوعد باني لك هرم
زل برق الوسم فوق التاسعه واحنا عطاش

كفي الماء لو قذف بي للحصى صرنا عدم
كفك الماء لو قذف بك للحصى قلتي: تلاش

لاجل هذا عنك ابا احكي واشتعالاتـي نـدم
كيف بعت القلب لاجل الرمح والطعنة بلاش

وش بقالي من حجاز العمر غير انثى نغـم
كلما غنت قصيم الوقت قال الناس عـاش


الباب كان

الباب كان .. وموجة الصبح فـالكـف
تختال بيضـا والثـرى كلـه جـروح

الباب كان .. وكاسر الغيث مـا خـف
حتى اشتعل وجه الشجر في فضا الروح

عساس كنت ومثلك الطيـر فـالشـف
يدنيك سطر .. وتزعلك ضيقة اللـوح

وامسيت ترقب كوكب فـالشفق جـف
عنه اليدين اختارت الشمس والضـوح

الباب كان .. وترعبك وحشـة الـرف
كيف المغيب المنطفـي يشعـل البـوح

اذكر سألتك واسمر الوبـل مـا كـف
وطيور وجهك تقبل اسـراب وتـروح

قلت المطر.. وافرد لك الهاجس العـف
شمس المكان وخاطر الغيـم مسفـوح

فـالبال بـدو وقفـوا للمطـر صـف
والباب كان لخاشع الصـوت مفتـوح


حــالــه

كلٍ وجرحه.. رضي والا على كيفه
يا ليتني في بعَض حالي على كيفي

وقتي وانا اخبر بصكاتي على سيفه
والمشكل انـي قليـلاتٍ محاريفـي

قلت افضح الوقت يا قلبي وتعنيفـه
قال اسكب العشق لو قفوا مواليفـي

قلت الهوى لذة احبابـه تحاسيفـه
طبعه... وانا لذتي فرقا تحاسيفـي

اصاحب الوقت وامشي منه في خيفه
والعوق ما تاصله فزعة معاريفـي

هذي على الحال سيمـاه وتكاليفـه
والواقع انه يبي حصـري وتكتيفـي

وارهبني الظل .. تسرقني تجاويفـه
لا يستمع لي .. ولا ينسى سواليفي

لا ني حديد النظر واستوعب الشيفه
ولا هو عزاز الوطا واقطع مشاريفي

اتعبني الظـل واعيتنـي تخاريفـه
يا قوة الله.. وهو يعرف تواصيفـي

ســدرة

يا سدرةٍ مـا يـوم ضمتنـي.. علـى قـل السعـه
لو هاجر ظلالي،، معي من غصنـك الظـل الطـري

علـى افتـراض انـك ذكرتـي لليمـام الزوبـعـه
مـا لليمـام الا يقـول فـداك روحـي.. غـبـري

وانك بـلا ريـش انكسـر فيـك اليمـام ومهجعـه
مـن يقنـع الغصـن المكابـر باليمـام المهتـري

وانـك تمايلتـي معـه.. أو مـا تمايلتـي مـعـه
من يلمس اغصانك يقـول لشوكهـا: وش تحتـري

شق العسل قلبـه علـى صـدرك وذاقـه باصبعـه
وانتي على العرف القديم.. اهل العسل .. واهل الشري

لك في شفـاه الطفـل هاذيـك الضحـوك المترعـه
لك في شفاه الذيب صمـت المـوت ودمـوع البـري

يا سدرة البـر البحـر خـاوى السفـن والاشرعـه
وانتي معي زلـة قـدم تكبـر بـلا مشـي وجـري

ابغـاك لـو شـح العسـل ظـل ومقيـل وذعذعـه
وان خيلـت غيمـة كحـل قلدتـهـا شــال وزري

قرطاس

مسترخيٍ في تعاريش الكسل غافـي
ما يشتريه الزهـق منـي ولا ابيعـه

مستسلـمٍ والغيـاب الفـادح النافـي
متوغـلٍ فـي شرايينـه واصابيعـه

حسبي عليه استميله وازرقه جافـي
ما فك ريقه على الحرف وقطع ريعه

نش البحر وانكسر لوحي على اصدافي
والملح ما تروي شطوطـه ينابيعـه

كان الكتابة زلـل والعـذر ميقافـي
في مستريح الورق مـا والله اطيعـه

وكان الكتابة بلـد ميـلاف وسنافـي
عز الله ان الزهق خابـت مطاليعـه

اثر الورق لا انكسر جـلاد متعافـي
واذا انكسرنا معه يا سهـل تطويعـه

عود المسا منحني في ربكة اطرافـي
والليل في غـرة القرطـاس توقيعـه

يا من يقاسمني الليلة بعـض قافـي
دام الكتابة حجـر والمحبـرة قيعـه

شاعر

عميق .. وحبال المطر ترفعه فوق
راسه سماء مفتوح واحلامه ابراج

دمه ثرى.. وبقلبه الصبح مدفـوق
خبزه ورق .. وبضاعته حبر وادراج

يهمي كما تهمي على وبلها بـروق
غصن البياض اللي لبس دمعته تاج

يزهر على كفه من الموجه حروق
واذا انتشى فيه اللهب يزهر امـواج

وان ما طعن بعروقه البيض مخلوق
ارخى على وجه الأسى عين وحجاج

كنه على حد الورق كف وعـروق
زيت كسر في حضرته عتمة سراج


الطلح

ضج الشجر .. قل للهبوب اللي تهـزه تنصفـه
وان ضجت البيد الصدية بالـورق قـل حيهـلا

حتى ايش لو جر الخلا بشته غـرور ونسفـه
كل الخلا في صولته ما زاد عن محض الخـلا

يا وسع بال الطلح ... الاقشر من زمانه يقصفه
والبيد لا عِـرق تجـوَّد بـه ولا تقنـى الغـلا

حت الورق.. والطلح في عوده حيـاة مترفـه
كنه من البهجة طفـل غيـم تشجـر واعتـلا

واصفى من اغصانـه قراطيسـه ودم ينزفـه
يقطن عليه اللي عزب للبرق في جـرد الفـلا

قل للهبوب اللي تهـزه لـو تريـض وتعرفـه
خضرا تهلي بالوجيه اللي علـى المـا والكـلا

قل للهبوب الطلح له بـوح التـراب وموقفـه
لو جف عرقه في سواد الرمل وانفـض المـلا

لا تذعرين الطلح يا خيـل الهبـوب المرجفـه
اما افتحي طـي الغصـون الملهمـة والا فـلا

الطلح ذاكـرة البـداة اللـي سـروا للمعرفـه
يوم العتام ولعثمات الدرب فـي عيـن الخـلا


سامح

قال الحطب بدِّده .. ليـل الشتـاء يذكـي
جمر المصافح .. وقال البـرد ذا دافـي

قال الحطب ردِّده .. حتـى الدفـا يحكـي
في التسامح .. وفيك الصاحـب الجافـي

قال الحطب جدِّده .. حتـى اللهب يركـي
غصن الملامح على نبع الجسد صافـي

قلت احطبه واسنده.. واذا اشتكى باشكي
ذيك المطامح وانا فـي مقعـدي غافـي

واذا احترق بـنشده .. عن شعلة المحكي
والبرد جامح ورى مـا تدفـي اطرافـي

هذا الحطب بلِّده .. جفـن نسـى يبكـي
ارجوك سامح رميـت الدمعـه خلافـي


جاهلة

تلبسين العشب.. والجـدب بـدوي تسكنينـه
غبشت عينه على ليل تكسـر فـي سراجـه

ما صدقتي.. والله انك ما صدقتـي والغبينـه
تضحكين .. ومهمهان القيظ يومي بك عجاجه

جاهلة تسقي ترابه .. والعطش تحفـر يدينـه
واشغلت بالعشب حيٍ غض طرفه عن حجاجه

تقدرين الآن حتـى.. تسأليـن اللـي تبينـه
عن مزاجه .. كيف يعني ما عصاه الا مزاجه

تقدرين بعمق مـا يطـري عليـك وتكتمينـه
تكذبين .. الا على صدر تشيليـن احتجاجـه

خبلت بي عذبة الطلات .. هالبنـت الحزينـة
في نحرها مـن قلايدهـا مساكيـن تواجـه

مقبله.. واقول ساق الدرب مكسـوره طعينـه
يجبر الله يا صويب الدرب خطـوات المواجـه

ممحله حتى يسيل الجـوع ويسنبـل جرينـه
سنبله .. واثر المطر فلاح وجروحه خراجـه

وش بعد يا عذبـة الطـلات قلـت وتنكرينـه
الوكـاد ان بدويِّـك مـا نفتـه الا فجـاجـه

لو صدقتي.. كان هذا العشب عنـي تنفحينـه
قلعة اللي غبشت عينه على عتمـة زجاجـه

تكتمين.. أو تكذبين .. او ما سمعتي تجهلينه
ما علي .. الغاية اني قلت .. وسكوتك سماجه


بعد غياب

جس نبض الباب قبل الطرقتين .. وجس لوحـه
قال يا كثر اليدين اللـي تقـول الـدار خالـي

ما صحا فالباب .. بعد الطرقتيـن الا الملوحـه
والغبار اللي على الدرفه حثـا وجـه الليالـي

صاح ياهل الدار.. واشعل فالفراغ الشرس بوحه
وانمحى في دمعتين وحس شي مـن التعالـي

في يدينه كان مفتـاح الغيـاب يشـد روحـه
للغبار وخندق الجـدران حـول البـاب عالـي

قال غاب الدار مدري غاب عني في وضوحـه
هو انا اللي جيت صوب الدار والا الـدار جالـي

والغبار اللي على المدخل تقضب فـي جروحـه
ما لفيت الا علـى ريـح تـذره فـي سؤالـي

اسمع ايام تردد مـن وراء البـاب السموحـه
ما نعرفك .. من تكون .. وليش ثاير وانفعالـي

كم ذبل فالروح نجم وضاقت النفـس الطموحـه
والحياة اللي طوتك هنـاك صلفـه مـا تبالـي

وانمحت فيك الدروب وصارت الخطوة شحوحـه
وجيت لا حادي ولا خيـال مظهـرك ارتجالـي

هز راسه في برود وصمت واوغل في نزوحـه
قال يلقى الـدار بعـد الطرقتيـن احـدٍ بدالـي

كان وجه الباب راكد مـا عليـه الا الملوحـه
والغبار اللي على الدرفه يقـول الـدار خالـي


لحظة

اللحظة اللـي تسـوق الطاولـه للقلـق
كانـت شبابيـك يفتحهـا ويصغـي لهـا

كانـت عصافيـر لذتـهـا تـمـر الأرق
فـي عتمـة اللـوح وتعانـق محابيلهـا

وكان الوحيد الذي بين الشفـق والشفـق
غيِّـه سـرق غايتـه واحيـاه تاويلهـا

الغايه اللي يبـي، منهـا يثـور الطلـق
والغايه اللـي تريـده فـاض بـه كيلهـا

داست على رغبته حتـى شفيـر الرمـق
يـوم انجلـت فالمحابـر باديـة ليلـهـا

قبل الورق والطوى .. غَلْ الجنى والورق
من شان في لحظة التنوير يضـوي لهـا

مغرم يمر السماء .. سارق يمر الغـرق
كم له على ما غفا العصفور يحكـي لهـا

يا صغرها الأرض والركض الغبي فـالنفق
يضيـق بـالأرض والحفـرة يغنـي لهـا


سيد الأغلاط

-وفـ لحظة انبساط
لو جيت في تبغ الشوارع
.......................... اخفر الدخان
بين اصبعين العاشرة
-يعني تمر الآن؟
-يعني
-كذا بدون اشتراط
-كذا
-انت وغد احيان
افرض طلع فــ الريح خيط الدار والعنوان
-ماهمّْ
-ليش؟
-اعتبري ان في رؤيتي اسقاط
-خداع يعني ؟
-لا
-إذاً.. هي شغلة استنباط
-يعني كذا
-واذا انسكب في قهوة الجيران
ما سربته النافذة منا بلا استئذان؟
-عادي
-خطأ.. ما تزفر القهوة كذا استعباط
-قولي ظلال النور في علية الروشان
-واذا غفى درويش في خصلة شعر دفيان
كيف اللهب ينعس ما بين الشعر والامشاط
..................... يا سيد الأغلاط؟
-مدري .. ولو معي برهان ..
ان الشوارع في زمان الحيف والاحباط
تصطاد بي غيداء طمست الشك والبرهان
يا بنت في تبغ الشوارغ لو غفى دخان
ما جيت من نفس الشوارع شاحب الألوان
وأبا أسألك في داخلك من لخبط الأنماط
وليش انتصاب الحسن بين الكعب والأقراط
مثل انتصاب الحزن بين القيد والإنسان
-عفواً .. انا عندي ارتباط
عفواً
أنا
عندي
ارتباط


حـــضـــور

منطفي هالليل حولـي .. والمنـام
شمس .. والظل الهدب وانت النزيل

وادري انك ضقت بي كـن الزحـام
اصبعي .. والضيف عيني .. والمقيل

هب ياذا الليـل .. يسهـرك وينـام
وانت في عيني يضيق بـك السبيـل

كيف اضمك نـوم وعيونـي قيـام
في طلبك الوقت كلـه يـا لخليـل

اشهد اني ضقت بـك: حـد الغمـام
واشهد انك ضقت بي: حـد الفتيـل

لو فرضت اني عجلـت وفـالكـلام
قلت احبك .. بس نكرانـك طويـل

هاك من جفني على ضيقـه سـلام
واعتذر لي منك وافسح لـي قليـل

حتى اشوفك فيك وان ضاق المقـام
جود لي من عينـك الهدبـا بديـل

بي تشوف اني علـى قفـر هـدام
ما خبنت العين فـي ثـوب الدليـل

تجليات

تقولين العـرب تهمـس: خويَّـه كيـف يحتملـه
بشر يا بعد مـا بينـه وبيـن الصاحـب العـادي

أعرف اني بشر مجدي ورق واسطورتـي جملـه
يصير الحـال والا مـا يصيـر بكيـف نشـادي

واعرف اني فرشت البال ضحكـة بنـت محتملـة
ذخرت لها الزكي من الجَهَد واعـذرت مـن زادي

مسحت الراس بهمـوم الزمـان وهدنـي حملـه
واثر حمل المكان اصعب... والاصعب حمل حسادي

واعرف اني تهـورت ونسفـت جـروح مندملـه
ومن زهوي رفضت المخرج الهين مـع انـدادي

واعرف انـي تجليـت وسمـاي بهالتـي ثملـه
ولا قلـت السمـاء حريتـي .. والارض جـلادي

أنا يا بنـت لـي درب خويـه حيـث يقسـم لـه
ومالـي والخـوي اللـي شعاعـه رث وحيـادي

تركته فـي هبـوب الصعلكـه وثيابـه السملـه
زماني، ما غفلت فـداخلي عـن تربـة اجـدادي

تبرعم فـانكسار الطلح غيم الروح من كـم لـه
عرفت ان المطر في مولـدي مـا بـل ميـلادي

اعلق فـالنساء يا بنـت وجهـك واتهنـدم لـه
لذيذة لآخـر الدنيـا ... عميقـه لآخـر بـلادي

واعلق فـالأسى جرح ولـد فـالتيـه واشتملـه
معي من قرني العشرين وجه اللـص والسـادي


الضلع والطرقي

انا عصاي الدرب واذا ضـوى
فـالليـل مخلابـه وسكينـه

شبيت لي ضوِ تنفـس هـوى
منـي .. وقهويتـه فناجينـه

وش هم لو صريت وقتي نوى
والبال تمـره فـي عراجينـه

خبزي قفار ولاعلي استـوى
ولاعجيـن الوقـت بطحينـه

ياضلع ياللي في طريقي عوى
والدرب عاثت بـه سراحيتـه

زادي قليل ومقتفينـي طـوى
والعمـر تسبقنـي مساكينـه

لاشك راسك في سحاب وروى
والظل في سفحـك شرايينـه

لاتحسب انّا في تعبنا سـوى
يابعد فرق الغيم عـن طينـه

انا تعبت ارقاك نـاب وهـوى
وانت اتعبك همـي وتكوينـه

لاتنشد الطرقي عن اللي غوى
مايحمـل الطرقـي عناوينـه

من يتبع الشمس النجيبه ثوى
ولا تكذب الغـدرا مضامينـه

الا شفيف الحـال والمحتـوى
صبحٍ تذر الشمس في عينـه